पुणे, १७ जुलै २०२५: पुण्यात डेटिंग अ‍ॅप्सवरून ओळख करून फसवणूक करण्याचे प्रकार दिवसेंदिवस वाढत आहेत. अशाच एका धक्कादायक घटनेत, एका तरुणाची ‘गाय डेटिंग अ‍ॅप’ वरून ओळख करून घेऊन त्याला ब्लॅकमेल करून १०,००० रुपयांची फसवणूक केल्याची घटना समोर आली आहे. नांदेड सिटी पोलीस ठाण्यात या प्रकरणी गुन्हा दाखल करण्यात आला असून एका आरोपीला अटक करण्यात आली आहे.

या प्रकारात पीडित आणि आरोपी यांची ओळख Grindr या समलैंगिक डेटिंग अ‍ॅपवर झाली. त्यानंतर दोघांमध्ये संभाषण होऊन आरोपीने पीडित तरुणाचा विश्वास संपादन केला आणि त्याला भेटायला बोलावले. भेटीनंतर आरोपीने त्याला कारमध्ये बसवून एका वेगळ्या ठिकाणी नेले.

तिथे पीडित तरुणावर मानसिक दबाव टाकून अश्लील व्हिडिओ शूट केला. त्यानंतर त्याला धमकी देत व्हिडिओ कुटुंबीयांना पाठवण्याची भीती दाखवून १०,००० रुपयांची खंडणी मागितली.

 

जेव्हा पीडित तरुणाने पैसे देण्यास नकार दिला, तेव्हा आरोपीने त्याचा मोबाईल हिसकावून Google Pay आणि PhonePe वरून थेट पैसे ट्रान्सफर केले. या संपूर्ण प्रकारानंतर पीडिताने नांदेड सिटी पोलीस ठाण्यात तक्रार दाखल केली.

पोलिसांनी तत्काळ कारवाई करत आरोपी रोबिन ऊर्फ शुभम कांबळे याला अटक केली असून दुसरा आरोपी ओंकार मंडलिक सध्या फरार आहे. पोलिसांकडून त्याचा शोध सुरू असून गुन्ह्यात वापरलेली कार जप्त करण्यात आली आहे.