कल्याणीनगर ‘पोर्श’ अपघात प्रकरणात अल्पवयीन कारचालकावर प्रौढ म्हणून फौजदारी खटला चालविण्याची मागणी पुणे बाल न्याय मंडळाने फेटाळल्यानंतर, पुणे पोलिसांनी सत्र न्यायालयात धाव घेतली आहे. बाल न्याय मंडळाच्या निर्णयात त्रुटी असल्याचा दावा करून पोलिसांनी अपील दाखल केल्याची माहिती विशेष सरकारी वकील शिशिर हिरे यांनी दिली.

बाल न्याय मंडळाने दिलेल्या निकालात, ‘पोर्श’ कार चालकाचा गुन्हा निर्घृण (हिनिअस) श्रेणीत मोडत नसल्याचे नमूद केले होते. मात्र, या निर्णयात स्पष्टता नसल्याचे सांगत पोलिसांनी सत्र न्यायालयात अर्ज दाखल केला आहे. “बाल न्याय मंडळाचा हा निकाल चुकीच्या गृहीतकावर आधारित असून, त्यामध्ये आवश्यक स्पष्टता नाही. अल्पवयीन चालकाचा गुन्हा अतिगंभीर श्रेणीत येतो. त्यामुळे त्याच्यावर प्रौढ म्हणून फौजदारी खटला चालविणे आवश्यक आहे,” असे हिरे यांनी सांगितले.

हा अपघात 18 मे 2024 रोजी मध्यरात्री कल्याणीनगर परिसरात झाला होता. भरधाव वेगाने ‘पोर्श’ कार चालवणाऱ्या अल्पवयीन मुलाने दुचाकीला जोरदार धडक दिली होती. या धडकेत दुचाकीवरील अभियंता तरुण आणि तरुणीचा जागीच मृत्यू झाला होता. तपासात उघड झाले की, अपघातापूर्वी चालक आणि त्याचे दोन मित्र मुंढवा येथील पबमध्ये मद्यपान करून आले होते.

या पार्श्वभूमीवर पोलिसांनी अल्पवयीन चालकावर प्रौढ म्हणून खटला चालविण्याची मागणी केली होती. मात्र, बचाव पक्षाने सर्वोच्च न्यायालयाच्या निवाड्याचा दाखला देत असा युक्तिवाद केला की, किमान सात वर्षांची शिक्षा असलेले गुन्हेच अतिगंभीर (हिनिअस) म्हणून वर्गीकृत करता येतात. हा युक्तिवाद ग्राह्य धरत बाल न्याय मंडळाने पोलिसांची मागणी फेटाळली होती.

दरम्यान, या प्रकरणातील आरोपीचा वडील आणि बिल्डर विशाल अगरवाल यांनी आईच्या शस्त्रक्रियेच्या कारणास्तव 21 दिवसांच्या तात्पुरत्या जामिनासाठी अर्ज केला होता, परंतु न्यायालयाने ती मागणी नाकारली होती.

कल्याणीनगर पोर्श अपघात, पुणे पोलीस, अल्पवयीन चालक खटला, बाल न्याय मंडळ निर्णय, पोर्श कार अपघात, विशाल अगरवाल, पुणे क्राईम न्यूज, हिनिअस क्राईम, सत्र न्यायालय पुणे