वाघोली (ता. हवेली) परिसरात लॅपटॉप चोरून पळणाऱ्या अट्टल चोरट्याला लोणी काळभोर पोलिसांनी कुंजीरवाडी येथील चिंतामणी पार्क प्लॉटींगजवळ बुधवारी (ता. 13) मोठ्या शिताफीने अटक केली. अटक करण्यात आलेल्या आरोपीचे नाव सागर नागराज (वय 31, रा. महादनुर, ता. अंबुर, जि. वेल्लुर, तामिळनाडू) असे असून, त्याच्याकडून ₹1,95,421 किंमतीचे पाच लॅपटॉप हस्तगत करण्यात आले आहेत.

वरिष्ठ पोलिस निरीक्षक राजेंद्र पन्हाळे यांनी दिलेल्या माहितीनुसार, पोलिस अंमलदार चक्रधर शिरगिरे व शैलेश कुदळे गस्त घालत असताना खबऱ्यामार्फत माहिती मिळाली की, कुंजीरवाडी येथे एक इसम काळ्या रंगाची जड बॅग घेऊन संशयास्पदरीत्या उभा आहे. पोलिसांनी तत्काळ कारवाई करत घटनास्थळी धाव घेतली. पोलिसांची चाहूल लागताच आरोपी पळू लागला, मात्र पोलिसांनी पाठलाग करून त्याला ताब्यात घेतले.

तपासात आरोपीच्या बॅगेत पाच चोरीचे लॅपटॉप सापडले. चौकशीत त्याने मंगळवारी (ता. 12) पहाटे वाघोलीतून लॅपटॉप चोरी केल्याची कबुली दिली. त्याच्याविरोधात वाघोली पोलिस ठाण्यात भारतीय न्याय संहिता कलम 305 (अ) अंतर्गत गुन्हा नोंदवण्यात आला आहे.

ही कारवाई पोलीस उपआयुक्त डॉ. राजकुमार शिंदे आणि सहाय्यक पोलीस आयुक्त अनुराधा उदमले यांच्या मार्गदर्शनाखाली करण्यात आली. कारवाईत वरिष्ठ पोलीस निरीक्षक राजेंद्र पन्हाळे, पोलीस निरीक्षक (गुन्हे) स्मिता पाटील, सहाय्यक पोलीस निरीक्षक कृष्णा बाबर तसेच पोलिस कर्मचारी गणेश सातपुते, रामहरी वणवे, तेज भोसले, अण्णा माने, संभाजी देवीकर, बापूसाहेब वाघमोडे, चक्रधर शिरगिरे, शैलेश कुदळे, बाजीराव विर, योगेश पाटील, सूरज कुंभार, प्रदीप गाडे, राहुल कर्डीले, सचिन सोनवणे, प्रवीण धडस यांनी सहभाग घेतला.