सुतारवाडी पक्षी अभयारण्यालगत अनधिकृतपणे सुरू असलेल्या RMC (Ready-Mix Concrete) प्लांटविरोधात सुतारवाडी ग्रामस्थांनी आज जोरदार आंदोलन छेडले. मनसे सुतारवाडी शाखेचे अध्यक्ष मयूर सुतार यांच्या नेतृत्वाखाली झालेले हे आंदोलन मोठ्या प्रमाणावर नागरिकांच्या उपस्थितीत पार पडले.

पाषाण तलाव पक्षी अभयारण्याच्या अत्यंत संवेदनशील परिसरात सुरु असलेल्या या प्लांटमुळे ध्वनी, वायू, जल आणि धूळ प्रदूषणात मोठ्या प्रमाणात वाढ होत असून, त्याचा पक्ष्यांच्या नैसर्गिक अधिवासावर गंभीर परिणाम होत असल्याची भावना नागरिकांनी व्यक्त केली. यामुळे पर्यावरणाला धोका निर्माण झाला असल्याचे आंदोलनकर्त्यांचे मत आहे.

---

मोठ्या संख्येने नागरिकांची उपस्थिती

या आंदोलनात मनसेचे उपविभाग अध्यक्ष पांडुरंग सुतार, अनिकेत मुरकुटे, सोमेश्वरवाडी शाखाध्यक्ष शिवम दळवी, मनसे पदाधिकारी महेंद्र रणपिसे, तसेच विविध राजकीय आणि सामाजिक क्षेत्रातील कार्यकर्ते आणि ग्रामस्थ मोठ्या संख्येने सहभागी झाले.

यामध्ये नरेंद्र वाणी, नासिर शेख, विजय धाकाने, श्रीकांत देशपांडे, उमेश साळुंखे, महेश सुतार (शिवदूत), अमोल फाले (शिवसेना-उद्धव ठाकरे), राहुल काकडे, संतोष खेडेकर, तसेच परिसरातील महिला व नागरिकांचा उत्स्फूर्त सहभाग होता.

---

NHAI अधिकाऱ्यांना निवेदन — प्लांट बंद करण्याचे आश्वासन

आंदोलनादरम्यान NHAI चे व्यवस्थापक श्री. मोहन दुबे आणि श्री. विक्रम पाटील यांना नागरिकांच्या मागण्यांचे निवेदन देण्यात आले. त्यांनी संबंधित RMC प्लांट बंद करण्याचे आश्वासन दिले असून मशीनरी आणि उपकरणे हलवण्याची प्रक्रिया सुरू असल्याची माहिती दिली.
त्यानंतर आंदोलनकर्त्यांसोबत लेबर कॅम्प तसेच परिसराची पाहणीही करण्यात आली.

---

कायदेशीर तपासणी व पर्यावरण रक्षणाची मागणी

लेबर कॅम्प व आसपासच्या जागेची कायदेशीरता, तसेच त्या ठिकाणामुळे पर्यावरणाला कोणताही धोका होऊ नये, याबाबतची मागणी आंदोलनकर्त्यांनी अधिकाऱ्यांना केली.
तसेच पाषाण तलाव परिसरात टाकला जाणारा राडारोडा, कचरा, अनधिकृत बांधकामे आणि पक्षी अभयारण्याला धोका पोहोचवणाऱ्या सर्व बाबींवर तात्काळ कारवाईची मागणी यावेळी करण्यात आली.

---

पोलीस प्रशासनाची उपस्थिती

आंदोलनकर्त्यांकडून दिलेले निवेदन स्वीकारताना पीएसआय सौ. अलका सरग आणि एपीआय श्री. सानप उपस्थित होते.

---

पाषाण तलाव पक्षी अभयारण्य बचाव कृती समितीची स्थापना

परिसरातील समस्यांचा पुढील पाठपुरावा करण्यासाठी
‘पाषाण तलाव पक्षी अभयारण्य बचाव कृती समिती – सुतारवाडी’
या समितीची स्थापना करण्यात आली.

ही समिती पर्यावरण संरक्षण, अनधिकृत कचरा फेक, बांधकामे, प्रदूषण आणि पक्षी अभयारण्याच्या संवर्धनासाठी पुढील आंदोलन व कारवाईची दिशा ठरवणार आहे.