पुणे आंतरराष्ट्रीय विमानतळावर वन्यजीव तस्करीचा एक धक्कादायक प्रकार उघडकीस आला आहे. बँकॉकहून आलेल्या दोन प्रवाशांनी चॉकलेट बॉक्सच्या आडून दुर्मीळ परदेशी वन्यप्राण्यांची तस्करी करण्याचा प्रयत्न केला होता. या प्रकरणात कस्टम विभागाने दोघांना अटक केली असून, मोठ्या प्रमाणात साप, ससे आणि पोपट जप्त करण्यात आले आहेत.

मिळालेल्या माहितीनुसार, सीमाशुल्क अधिकाऱ्यांना मंगळवारी रात्री प्रवाशांच्या बॅगबाबत संशय आल्याने तपासणी करण्यात आली. या तपासणीत चॉकलेट बॉक्समध्ये लपवून ठेवलेले १४ ग्रीन ट्री पायथन साप, ४ ग्रीन आय पॅरेट पोपट, आणि २ दुर्मीळ सुमात्रा ससे आढळून आले. ही सर्व प्राणीप्रजाती आंतरराष्ट्रीय स्तरावर संरक्षित असून त्यांची वाहतूक व विक्री बेकायदेशीर आहे.

तपासादरम्यान दुर्दैवाने एका सापाचा मृत्यू झाल्याचे अधिकाऱ्यांनी सांगितले. वन्यजीव तस्करी ही आंतरराष्ट्रीय कायद्यांनुसार गंभीर गुन्हा मानली जाते. संबंधित प्रवाशांविरोधात वन्यजीव संरक्षण कायद्यानुसार गुन्हा दाखल करण्यात आला आहे.

जप्त करण्यात आलेले प्राणी मूळ देशात म्हणजेच थायलंडमध्ये परत पाठवण्याची प्रक्रिया सुरू आहे. कस्टम विभागाकडून पुढील तपास सुरू असून, ही तस्करी कोणत्या मोठ्या रॅकेटचा भाग आहे का, याचा शोध घेतला जात आहे.