पुण्यात गुन्हेगारीच्या घटनांमध्ये वाढ होत असतानाच बुधवार पेठ परिसरात एक नवीन फसवणुकीचा प्रकार उघडकीस आला आहे. बुधवार पेठेत गुप्तपणे चित्रीकरण करून लोकांना बदनामीच्या भीतीने पैसे उकळण्याचा प्रकार समोर आला आहे. याप्रकरणी पुणे पोलिसांनी आयुष राजू चौगुले आणि सदफ पठाण या दोघांना अटक केली आहे.

पोलिसांकडून मिळालेल्या माहितीनुसार, एका IT इंजिनीअरने आपल्या मित्रासोबत बुधवार पेठ परिसरात १३ जुलै रोजी काही कामासाठी भेट दिली होती. तेव्हा आयुष चौगुले आणि सदफ पठाण या दोघांनी त्या तरुणाचा मोबाईलद्वारे गुपचूप व्हिडिओ शूट केला. या इंजिनीअरचे वास्तव्य किर्कीटवाडी, सिंहगड रस्ता येथे असून त्याचे घर नांदेड सिटी परिसरात आहे.

काम आटोपल्यानंतर आयुष आणि सदफ त्याच्या मागावर राहिले आणि थेट त्याच्या घरी पोहोचले. घरी पत्नी आणि मुले नसताना त्यांनी त्याला विचारले, “तू बुधवार पेठेत का गेला होतास?” असे विचारून तो व्हिडिओ दाखवला आणि ₹२०,००० ची खंडणी मागितली.

इंजिनीअरने पैसे देण्यास नकार दिल्यानंतर आरोपींनी नवा कट रचला. त्यांनी सांगितले की, “तू आमच्याकडून रोख ₹२०,००० घेतले होते, ते पैसे ऑनलाइन परत करायचे होते. अन्यथा आम्ही पोलिसांत तक्रार करू. चौकशीत तुझा व्हिडिओ दाखवून बदनामी करू.”

तरीही पीडित युवकाने पैसे देण्यास नकार दिला. त्यामुळे आरोपींनी पोलिस हेल्पलाईनवर कॉल करून उलट त्याच्याविरोधात खोटे तक्रार अर्ज दाखल केला. प्रारंभी पोलिसांनी आरोपींचे म्हणणे खरे मानून इंजिनीअरची चौकशी सुरू केली. मात्र, स्थानिक पत्रकाराच्या मदतीने इंजिनीअरने आपली बाजू स्पष्ट केली आणि संपूर्ण प्रकार उघड झाला.

प्रकरणाची सखोल चौकशी केल्यानंतर पुणे पोलिसांनी आयुष चौगुले आणि सदफ पठाण या दोघांविरोधात फसवणूक, खंडणी, खोटी तक्रार आणि ब्लॅकमेलिंगचे गुन्हे दाखल केले आहेत. दोघांची अटक करण्यात आली असून पुढील तपास सुरू आहे.