Pune News, १७ जुलै २०२५ (Bhor Accident): पुण्यातील भोर तालुक्यातील दुर्गम दुर्गाडी मार्गावर आज सकाळी एसटी बसचा भीषण अपघात झाला. अरुंद रस्त्यावरून घसरत बस थेट रस्त्याच्या साईड पट्टीवरून गटारात कोसळली. अपघाताच्या वेळी बसमध्ये चालकासह पाच प्रवासी होते. सुदैवाने कोणतीही जीवितहानी झाली नाही.

भोर तालुक्यातील दुर्गाडी रस्त्यावरून ही एसटी बस प्रवास करत होती. समोरून वाहन आल्यामुळे साईड देताना बस साईड पट्टीवरून थेट गटारात घसरली. अपघात इतका तीव्र होता की बस गटारात अर्धवट उलटली. बसमधील प्रवाशांना किरकोळ जखमा झाल्या असून त्यांना तातडीने प्राथमिक उपचारासाठी स्थानिक आरोग्य केंद्रात नेण्यात आले.

बस गटारात अडकल्यामुळे घटनास्थळी जेसीबी मागवण्यात आला आणि त्याच्या सहाय्याने बस बाहेर काढण्यात आली. या अपघातामुळे काही काळ वाहतुकीस अडथळा निर्माण झाला होता.

विशेष म्हणजे, गेल्या आठवड्यातील ही तिसरी अपघाताची घटना आहे जिथे एसटी बस साईड पट्टीवरून घसरून गटारात कोसळली आहे. वारंवार घडणाऱ्या अशा घटनांमुळे प्रवासी व स्थानिक नागरिकांमध्ये भीतीचे वातावरण आहे.

दुर्गम रस्ते, अरुंद साईड पट्ट्या आणि खड्डेमय रस्ते हे अपघाताचे प्रमुख कारण असल्याचे स्थानिकांनी निदर्शनास आणले आहे. त्यामुळे रस्त्यांचे रुंदीकरण, साईड पट्ट्यांचा मजबूत भराव, तसेच दुरुस्तीकडे लक्ष देण्याची मागणी नागरिकांनी प्रशासनाकडे केली आहे.