पुणे (क्राइम न्यूज) — रक्तदाब कमी झाल्यावर डॉक्टरांच्या सल्ल्याने दिले जाणारे एक इंजेक्शन खेळाडू व तरुणांकडून चुकीच्या पद्धतीने वापरले जात असल्याचे गंभीर प्रकरण समोर आले आहे. या इंजेक्शनची बेकायदेशीर विक्री करणाऱ्या एका 24 वर्षीय तरुणावर वाकड पोलीस ठाण्यात गुन्हा दाखल करण्यात आला आहे. ही कारवाई शुक्रवारी सायंकाळी थेरगाव फाटा परिसरात करण्यात आली.
या प्रकरणी पोलीस शिपाई अमर राणे यांनी फिर्याद दिली आहे. पोलिसांना मिळालेल्या गोपनीय माहितीनुसार आरोपी कोणताही परवाना नसताना औषधांची विक्री करत असल्याचे आढळून आले. त्यानंतर पोलिसांनी सापळा रचून कारवाई केली असता आरोपी मेफेन्टरमाइन सल्फेट या इंजेक्शनची अवैध विक्री करताना रंगेहाथ सापडला.
मेफेन्टरमाइन सल्फेट हे इंजेक्शन प्रामुख्याने कमी रक्तदाब असलेल्या रुग्णांसाठी डॉक्टरांच्या सल्ल्याने वापरले जाते. मात्र, काही खेळाडू आणि तरुण शारीरिक ताकद व कार्यक्षमता वाढवण्यासाठी या औषधाचा गैरवापर करत असल्याचे तपासात समोर आले आहे. अशा चुकीच्या वापरामुळे हृदयविकाराचा झटका येणे, गंभीर आजार होणे किंवा मृत्यू होण्याचीही शक्यता असल्याची माहिती पोलिसांनी दिली.
कारवाईदरम्यान पोलिसांनी आरोपीकडून सुमारे 67,452 रुपये किमतीचा इंजेक्शनचा साठा जप्त केला आहे. जप्त केलेली औषधे कुठून आणली जात होती आणि कोणाला विकली जात होती, याचा सखोल तपास सुरू आहे. वाकड पोलीस या प्रकरणाचा पुढील तपास करत असून अवैध औषध विक्रीच्या रॅकेटचा पर्दाफाश करण्यासाठी तपासाची चक्रे अधिक वेगाने फिरवली आहेत.