येवलेवाडी परिसरात प्रकार; पालकांमध्ये भीतीचे वातावरण, पोलीस तपास सुरू……
पुणे : पुण्यातील येवलेवाडी परिसरातून एक धक्कादायक आणि संतापजनक घटना समोर आली आहे. घरासमोर खेळत असलेल्या ११ वर्षीय मुलीचा विनयभंग केल्याप्रकरणी ३० वर्षीय व्यक्तीविरोधात पोलिसांनी गुन्हा दाखल केला आहे. या घटनेमुळे परिसरातील नागरिकांमध्ये भीती आणि संतापाचे वातावरण निर्माण झाले आहे.
मिळालेल्या माहितीनुसार, ही घटना ४ फेब्रुवारी रोजी दुपारी सुमारे ४ वाजण्याच्या सुमारास घडली. पीडित मुलगी घराबाहेर खेळत असताना आरोपी प्रशांत काळे तेथे आला. त्याने मुलीशी अश्लील संवाद साधत तिच्याशी गैरवर्तन करण्याचा प्रयत्न केला. या प्रकारामुळे मुलगी घाबरून तात्काळ घरात पळून गेली व तिने संपूर्ण घटना आपल्या पालकांना सांगितली.
मुलीच्या पालकांनी कोणताही विलंब न करता पोलीस ठाण्यात धाव घेत तक्रार दाखल केली. पोलिसांनी आरोपीविरुद्ध भारतीय न्याय संहिता तसेच पोक्सो (POCSO) कायद्यातील संबंधित कलमान्वये गुन्हा दाखल केला आहे. या प्रकरणाचा पुढील तपास पोलीस उपनिरीक्षक महाडिक करत आहेत.
पोलिसांनी तात्काळ कारवाई करत आरोपीचा शोध सुरू केला असून परिसरातील सीसीटीव्ही फुटेज तपासले जात आहे. तसेच परिसरातील नागरिकांचे जबाब नोंदवण्याची प्रक्रिया देखील सुरू आहे. या घटनेनंतर पालकांमध्ये मोठी चिंता व्यक्त केली जात असून, लहान मुलांच्या सुरक्षेबाबत प्रश्नचिन्ह उपस्थित झाले आहे.
दरम्यान, पोलिस प्रशासनाने पालकांना आवाहन केले आहे की, लहान मुलांना एकटे बाहेर खेळायला पाठवताना विशेष काळजी घ्यावी आणि कोणतीही संशयास्पद हालचाल आढळल्यास तात्काळ पोलिसांशी संपर्क साधावा. तसेच अशा प्रकारच्या गुन्ह्यांमध्ये कठोर कारवाई केली जाईल, असा इशाराही पोलिसांकडून देण्यात आला आहे.
Leave a Reply