दादर विद्यार्थी आंदोलनात गैरवर्तनाचा आरोप; व्हायरल व्हिडिओवरून मुंबईत खळबळ

मुंबई : दादरमध्ये झालेल्या विद्यार्थी आंदोलनादरम्यान एका विद्यार्थिनीशी गैरवर्तन झाल्याचा आरोप समोर आल्यानंतर राज्यातील राजकीय वातावरण चांगलेच तापले आहे. सोशल मीडियावर व्हायरल झालेल्या एका व्हिडिओमुळे या प्रकरणाने मोठे वळण घेतले असून, सिव्हिल ड्रेसमधील एका पोलीस कर्मचाऱ्याने विद्यार्थिनीला आक्षेपार्ह पद्धतीने पकडल्याचा आरोप करण्यात आला आहे. या घटनेनंतर विरोधी पक्षांनी तीव्र संताप व्यक्त करत संबंधित पोलीस कर्मचाऱ्याला तातडीने निलंबित करून त्याच्यावर कठोर कारवाई करण्याची मागणी केली आहे.

विद्यार्थ्यांच्या आंदोलनादरम्यान घडलेल्या या घटनेचा व्हिडिओ सोशल मीडियावर मोठ्या प्रमाणात व्हायरल झाला. त्यानंतर काँग्रेसच्या वर्षा गायकवाड, राष्ट्रवादी काँग्रेस (शरद पवार गट)चे आमदार रोहित पवार आणि आमदार जितेंद्र आव्हाड यांनी या घटनेचा निषेध करत निष्पक्ष चौकशीची मागणी केली. विद्यार्थिनीशी गैरवर्तन झाल्याचा आरोप गंभीर असून दोषींवर तातडीने कारवाई व्हावी, अशी भूमिका त्यांनी मांडली आहे.

दरम्यान, संबंधित पोलीस कर्मचारी शिवाजी पार्क पोलीस ठाण्यात कार्यरत असलेले पोलीस हवालदार असल्याची माहिती समोर आली आहे. या घटनेनंतर त्यांच्या भूमिकेवर प्रश्नचिन्ह उपस्थित करण्यात येत असून सोशल मीडियावरही यावर मोठी चर्चा सुरू आहे.

मुंबई पोलिसांची भूमिका

या प्रकरणावर मुंबई पोलिसांनी आपली भूमिका स्पष्ट करत व्हिडिओबाबत वेगळा दावा केला आहे. पोलिसांच्या माहितीनुसार, आंदोलन संपल्यानंतर निळा रेनकोट घातलेला एक तरुण पुन्हा विद्यार्थ्यांना आंदोलनासाठी प्रवृत्त करत होता. त्याला ताब्यात घेण्यासाठी पोलीस हवालदार पुढे गेले. त्यावेळी त्या तरुणासोबत असलेली तरुणी मध्ये आली. त्यामुळे पुरुष आंदोलकाला ताब्यात घेण्याच्या प्रयत्नात हा प्रसंग घडल्याचे पोलिसांचे म्हणणे आहे.

मुंबई पोलीस उपायुक्त कार्यालयानेही या घटनेची वरिष्ठ अधिकाऱ्यांकडून सखोल पडताळणी करण्यात आल्याचे सांगितले आहे. संपूर्ण व्हिडिओ बारकाईने तपासल्यानंतर प्राथमिक चौकशीत संबंधित अधिकारी पुरुष आंदोलकाला पकडण्याचा प्रयत्न करत असल्याचे दिसून आले आहे. त्यामुळे सोशल मीडियावर व्हायरल होत असलेल्या व्हिडिओचा चुकीचा अर्थ लावू नये, असे आवाहन पोलिसांनी केले आहे.

पोलिसांनी असेही स्पष्ट केले की, घटनेचा संपूर्ण संदर्भ न पाहता केवळ काही सेकंदांचा व्हिडिओ पाहून निष्कर्ष काढणे योग्य नाही. या प्रकरणातील सर्व बाजू तपासल्या जात असून संबंधित अधिकाऱ्यांच्या भूमिकेचीही चौकशी सुरू आहे.

राजकीय आरोप-प्रत्यारोपांना वेग

या घटनेनंतर विरोधी पक्षांनी सरकार आणि पोलिसांच्या भूमिकेवर प्रश्न उपस्थित केले आहेत. विद्यार्थ्यांच्या सुरक्षेचा मुद्दा उपस्थित करत या प्रकरणात निष्पक्ष चौकशी करून सत्य बाहेर आणण्याची मागणी करण्यात येत आहे. दुसरीकडे, मुंबई पोलिसांनी चौकशी पूर्ण होईपर्यंत कोणत्याही निष्कर्षापर्यंत पोहोचू नये, असे आवाहन केले आहे.