दौंडमध्ये घरातील विजेच्या कामात काळाचा घाला; एकाला वाचवायला धावला अन् दोघांचाही दुर्दैवी अंत

पुणे : पावसाळ्यात विद्युत यंत्रणांपासून अधिक काळजी घेण्याची गरज असतानाच दौंड तालुक्यातून मन हेलावून टाकणारी घटना समोर आली आहे. घरातील विजेच्या कामादरम्यान एका तरुणाला अचानक विजेचा जोरदार धक्का बसला. हे पाहताच त्याचा चुलत भाऊ त्याला वाचवण्यासाठी धावला; मात्र पुढच्याच क्षणी घडलेल्या घटनेने कुटुंबीयांवर दुःखाचा डोंगर कोसळला.

दौंड तालुक्यातील राहू गावातील सोनवणेमळा येथे ही दुर्दैवी घटना घडली. ओम भोईटे आणि रोहित भोईटे अशी मृत चुलत भावांची नावे आहेत. आज सकाळच्या सुमारास अनिल भोईटे यांच्या घरी घरगुती विजेचे काम सुरू होते.

याचदरम्यान ओम भोईटे यांना अचानक विजेचा तीव्र धक्का बसला. ओमला विजेचा धक्का बसल्याचे लक्षात येताच त्याचा चुलत भाऊ रोहित त्याच्या मदतीसाठी धावला. मात्र, ओमला वाचवण्याचा प्रयत्न करत असतानाच रोहितलाही विद्युत प्रवाहाचा जोरदार धक्का बसला.

दोघांना विजेचा धक्का बसल्याचे पाहून त्यांच्या आईनेही मुलांच्या बचावासाठी धाव घेतली. सुदैवाने त्या या दुर्घटनेत बचावल्या. त्यानंतर कुटुंबीयांनी ओम आणि रोहित यांना तातडीने यवत येथील ग्रामीण रुग्णालयात दाखल केले. मात्र, वैद्यकीय तपासणीनंतर डॉक्टरांनी दोघांनाही मृत घोषित केले.

या घटनेमुळे सोनवणेमळा गावावर शोककळा पसरली असून भोईटे कुटुंबीयांवर दुःखाचा डोंगर कोसळला आहे. पावसाळ्यात घरगुती तसेच शेतातील विद्युत उपकरणे हाताळताना नागरिकांनी विशेष खबरदारी घेण्याचे आवाहन करण्यात येत आहे.

दुर्दैवी घटनेनंतर परिसरातील नागरिकांनी हळहळ व्यक्त केली आहे. घरातील विद्युत कामे करताना योग्य ती खबरदारी न घेतल्यास क्षणात मोठी दुर्घटना घडू शकते, हे या घटनेतून पुन्हा एकदा समोर आले आहे. विशेषतः पावसाळ्यात ओलावा आणि पाण्यामुळे विद्युत प्रवाहाचा धोका वाढत असल्याने नागरिकांनी अधिक सतर्क राहण्याची गरज आहे.

दरम्यान, विद्युत उपकरणे किंवा वायरिंगमध्ये बिघाड झाल्यास स्वतःहून दुरुस्ती करण्याचा प्रयत्न न करता प्रशिक्षित इलेक्ट्रिशियनची मदत घ्यावी, असे आवाहन करण्यात येत आहे. तसेच वीजवाहिन्या, मीटर, स्विचबोर्ड किंवा विद्युत खांबाजवळ पाणी साचले असल्यास त्यापासून दूर राहणे गरजेचे आहे.