दुधातील भेसळीचे दोन मोठे प्रकार उघड; मुंबई आणि फुलंब्रीत FDAची मोठी कारवाई
मुंबईतील दहिसर आणि छत्रपती संभाजीनगरमधील फुलंब्री येथे अन्न व औषध प्रशासनाने केलेल्या छाप्यांत दुधातील भेसळीचे दोन मोठे प्रकार उघडकीस आले. नामांकित कंपन्यांच्या दुधात पाणी मिसळणे, पावडरपासून बनावट दूध तयार करणे आणि हे दूध वेगवेगळ्या नावाने पुरवणे असे धक्कादायक प्रकार समोर आले. मोठ्या प्रमाणात दूध, पावडर आणि मिश्रण जप्त करून नष्ट करण्यात आले असून काही आस्थापनांचे परवानेही निलंबित करण्यात आले आहेत.
मुंबई आणि फुलंब्रीत FDAची मोठी कारवाई
मुंबईतील दहिसर आणि छत्रपती संभाजीनगरमधील फुलंब्री परिसरात अन्न व औषध प्रशासनाने केलेल्या कारवाईत दुधातील भेसळीचे दोन मोठे प्रकार उघडकीस आले आहेत. ग्राहकांच्या आरोग्याशी खेळ करणारे हे प्रकार समोर आल्यानंतर राज्यभरात खळबळ उडाली आहे. विशेष म्हणजे, या कारवायांमध्ये मोठ्या प्रमाणावर दूध आणि पावडर जप्त करून जागेवरच नष्ट करण्यात आली आहे.
दहिसरमध्ये छापा, 470 लिटर दूध नष्ट
दहिसर पूर्वेकडील दुबे चाळ परिसरात 9 जुलै 2026 रोजी पहाटे 4.45 वाजता अन्न व औषध प्रशासन आणि गुन्हे शाखा युनिट 12 यांनी संयुक्त छापा टाकला. राजेश कंपाऊंडजवळील दुबे चाळ क्रमांक 2, रूम क्रमांक B-3 येथे ही कारवाई करण्यात आली. याठिकाणी लिंगय्या भिक्षमय्या गंटा, वय 42, याला नामांकित कंपन्यांच्या दुधाच्या पिशव्या फोडून त्यात पाणी आणि इतर घटक मिसळून भेसळ करण्याच्या अवस्थेत पकडण्यात आले.
या कारवाईत 470 लिटर भेसळयुक्त दूध जागेवरच नष्ट करण्यात आले. या दुधाची किंमत 29 हजार 750 रुपये इतकी असून, ते सार्वजनिक आरोग्यास अत्यंत घातक असल्याचे अधिकाऱ्यांनी स्पष्ट केले. या प्रकरणात एकाला अटक करण्यात आली असून दहिसर पोलिस ठाण्यात गुन्हा दाखल करण्यात आला आहे. तसेच पुढील विश्लेषणासाठी दुधाचे तीन नमुने घेण्यात आले आहेत.
फुलंब्रीत पावडरपासून बनावट दूध
छत्रपती संभाजीनगर जिल्ह्यातील फुलंब्री येथेही असाच धक्कादायक प्रकार समोर आला आहे. 8 जुलै 2026 रोजी मिळालेल्या गुप्त माहितीच्या आधारे एफडीए अधिकारी आणि फुलंब्री पोलिसांनी रेणुका पेट्रोल पंपाजवळ असलेल्या ‘सिद्धेश्वर मिल्क डेअरी’वर छापा टाकला. तपासादरम्यान या डेअरीत व्हे परमीएट पावडरचा वापर करून भेसळयुक्त दूध तयार केले जात असल्याचा संशय बळावला.
कारवाईत गवर्धन ब्रँडची 198 किलो व्हे परमीएट पावडर, किंमत 27 हजार 324 रुपये, आणि म्लेकपोल ब्रँडची 298 किलो पावडर, किंमत 39 हजार 336 रुपये, असा एकूण 496 किलो पावडर जप्त करण्यात आली. याशिवाय टाकीत साठवलेले 3 हजार 498 लिटर मिश्र दूध, किंमत 1 लाख 32 हजार 924 रुपये, आरोग्यास अपायकारक असल्याच्या संशयावरून जागेवरच नष्ट करण्यात आले.
दुसऱ्या ब्रँडच्या नावाने विक्री
तपासात हे दूध पुढे ‘मि. शिवकृपा मिल्क डेअरी’, पानवाडी रोड, फुलंब्री या नावाने विकले जात असल्याची माहिती समोर आली. त्या ठिकाणीही छापा टाकला असता अनेक गंभीर त्रुटी आढळून आल्या. त्यामुळे ‘सिद्धेश्वर डेअरी’ आणि ‘शिवकृपा डेअरी’ या दोन्ही आस्थापनांचे अन्न परवाने तत्काळ निलंबित करण्यात आले आहेत.
धक्कादायक बाब म्हणजे, हे दूध ‘मराठवाडा मिल्क प्रोड्यूसर कंपनी’ (मॅन्टेनन्स ऑफ म/स सोनाई डेअरी, इंदापूर) तसेच गुजरातमधील गोध्रा येथील ‘पंचमहाल को-ऑपरेटिव्ह मिल्क प्रोड्यूसर्स’ यांच्यापर्यंतही पुरवले जात असल्याचे तपासात उघड झाले आहे.
गुन्हा दाखल, तपास सुरू
या प्रकरणात राजेंद्र जाधव, संग्रह केंद्र चालक, योगेश लहाने, उपस्थित व्यक्ती, बी.एम. इन्ग्रेडियंट्स, छत्रपती संभाजीनगर येथील पावडर पुरवठादार, तसेच शिवकृपा दूध डेअरी यांच्याविरोधात फुलंब्री पोलिस ठाण्यात गुन्हा दाखल करण्यात आला आहे. पुढील तपास सुरू असून, या भेसळ रॅकेटचे आणखी धागेदोरे समोर येण्याची शक्यता व्यक्त केली जात आहे.
नागरिकांच्या आरोग्यास धोका
लहान मुलांपासून वृद्धांपर्यंत सर्वांच्या आरोग्याशी खेळ करणाऱ्या या भेसळ प्रकरणांनी नागरिकांमध्ये तीव्र संताप व्यक्त होत आहे. दूध हा दररोजच्या आहारातील अत्यावश्यक घटक असून त्यात भेसळ होत असल्याचे समोर आल्याने अन्नसुरक्षेवर गंभीर प्रश्नचिन्ह निर्माण झाले आहे.