FDA अधिकाऱ्यांनाच निलंबनाचा इशारा! नरहरी झिरवाळांचा कडक पवित्रा; तुकाराम मुंढेंच्या धडक कारवाईत 48 लाखांचा अन्नसाठा जप्त

मुंबई : राज्यात सणासुदीच्या पार्श्वभूमीवर अन्न व औषध प्रशासनाने (FDA) भेसळयुक्त आणि निकृष्ट अन्नपदार्थांविरोधात कारवाईचा धडाका सुरू ठेवला आहे. आयुक्त तुकाराम मुंढे यांच्या मार्गदर्शनाखाली विविध ठिकाणी छापेमारी, अन्नसाठा जप्ती आणि परवाने निलंबनाच्या कारवाया होत आहेत. मात्र, या कारवायांदरम्यान काही अधिकाऱ्यांनी आपल्या अधिकारक्षेत्राबाहेर जाऊन छापे टाकल्याचे आरोप समोर आल्याने आता विभागातील अधिकाऱ्यांवरही कारवाईची टांगती तलवार निर्माण झाली आहे.

नरहरी झिरवाळांचा अधिकाऱ्यांना थेट इशारा

अन्न व औषध प्रशासन विभागाचे मंत्री नरहरी झिरवाळ यांनी नियमांचे उल्लंघन करणाऱ्या अधिकाऱ्यांना कठोर कारवाईचा इशारा दिला आहे. अधिकारक्षेत्राबाहेर जाऊन कारवाई केल्याचे चौकशीत सिद्ध झाल्यास संबंधित अधिकाऱ्यांवर निलंबनाची कारवाई केली जाऊ शकते, असे त्यांनी स्पष्ट केले.

या प्रकरणाबाबत मुख्यमंत्री देवेंद्र फडणवीस यांच्याशी चर्चा झाली असून पुढील कारवाईसंदर्भात मुख्यमंत्री निर्णय घेतील, असेही झिरवाळ यांनी सांगितले. त्यामुळे FDA मधील आणखी काही अधिकाऱ्यांवर कारवाई होण्याची शक्यता व्यक्त केली जात आहे.

मालेगाव सुपारी प्रकरणात पाच अधिकारी निलंबित

दरम्यान, नाशिक जिल्ह्यातील मालेगाव येथील कोट्यवधी रुपयांच्या सुपारी प्रकरणात FDA च्या पाच अधिकाऱ्यांचे निलंबन करण्यात आले आहे. सुमारे 252 मेट्रिक टन निकृष्ट सुपारी नष्ट केल्याचे कागदोपत्री दाखवून ती पुन्हा बाजारात विक्रीस आणल्याचा संशय व्यक्त करण्यात आला आहे.

संबंधित सुपारीची किंमत सुमारे 10 कोटी रुपये असल्याचे वृत्त असून या प्रकरणात विभागीय चौकशीही होणार आहे. या कारवाईमुळे अन्न व औषध प्रशासन विभागातील कथित अनियमिततेचा मुद्दा पुन्हा चर्चेत आला आहे.

पुणे आणि कोकण विभागात लाखो रुपयांचा अन्नसाठा जप्त

दुसरीकडे, FDA ने 14 आणि 15 ऑक्टोबर रोजी पुणे आणि कोकण विभागात विशेष तपासणी मोहीम राबवली. या मोहिमेत मुदतबाह्य, खराब आणि विक्रीस अयोग्य ठरलेले अन्नपदार्थ नष्ट करण्याऐवजी पुन्हा बाजारात आणले जात असल्याचा संशयास्पद प्रकार उघडकीस आला.

या कारवाईत सुमारे 48 लाख रुपयांचा अन्नसाठा जप्त करण्यात आला. तपासणीनंतर पाच आस्थापनांचे परवाने निलंबित करण्यात आले, तर चार विनापरवाना ठिकाणांवरील व्यवसाय बंद करण्याचे निर्देश देण्यात आले. संबंधित प्रकरणात पोलिसांनी गुन्हाही नोंदवला आहे.

कारवाईचा धडाका सुरूच; दोषी अधिकाऱ्यांवरही बडगा?

एकीकडे भेसळयुक्त आणि निकृष्ट अन्नपदार्थांविरोधात FDA कठोर पावले उचलत असताना दुसरीकडे विभागातील अधिकाऱ्यांच्या कार्यपद्धतीवरही प्रश्न उपस्थित होत आहेत. त्यामुळे नियम मोडणाऱ्या व्यावसायिकांसोबत अधिकारांचा गैरवापर करणाऱ्या अधिकाऱ्यांवरही कारवाई होणार का, याकडे आता सर्वांचे लक्ष लागले आहे.