आणि झाला ७ लाखाचा फ्रॉड ....

पुणे: नोकरीच्या शोधात असलेल्या उमेदवारांना लक्ष्य करणाऱ्या सायबर भामट्यांचा आणखी एक धक्कादायक प्रकार पुण्यात उघडकीस आला आहे. हिंजवडी परिसरात राहणाऱ्या एका ३६ वर्षीय आयटी अभियंत्याची आकर्षक नोकरीचे आमिष दाखवून तब्बल ७ लाख रुपयांची ऑनलाइन फसवणूक करण्यात आली आहे.

पोलिसांनी दिलेल्या माहितीनुसार, संबंधित आयटी अभियंता नवीन नोकरीच्या शोधात होता. याच काळात त्याच्याशी संपर्क साधत काही व्यक्तींनी स्वतःला एका नामांकित प्लेसमेंट कंपनीचे प्रतिनिधी असल्याचे सांगितले. मोठ्या आयटी कंपनीत चांगल्या पगाराची नोकरी मिळवून देण्याचे आश्वासन देत त्यांनी अभियंत्याचा विश्वास संपादन केला.

यानंतर नोंदणी शुल्क, प्रोसेसिंग फी, व्हेरिफिकेशन चार्जेस आणि इतर विविध कारणे सांगत आरोपींनी टप्प्याटप्प्याने संबंधित अभियंत्याकडून पैसे मागितले. नोकरी निश्चित होईल, या आशेने त्याने वेळोवेळी रक्कम भरली. अखेर सुमारे ७ लाख रुपये आरोपींच्या खात्यात जमा झाल्यानंतरही नोकरीसंदर्भात कोणतीही ठोस माहिती किंवा नियुक्तीपत्र मिळाले नाही.

वारंवार संपर्क साधूनही समाधानकारक उत्तर न मिळाल्याने आपली फसवणूक झाल्याचे अभियंत्याच्या लक्षात आले. त्यानंतर त्यांनी पोलिसांकडे तक्रार दाखल केली. तक्रारीच्या आधारे पोलिसांनी अज्ञात आरोपींविरुद्ध गुन्हा नोंदवून तपास सुरू केला आहे. बँक व्यवहार, मोबाईल क्रमांक आणि डिजिटल पुराव्यांच्या आधारे आरोपींचा शोध घेण्याचे काम सुरू आहे.

दरम्यान, नोकरीच्या शोधात असलेल्या नागरिकांनी कोणत्याही कंपनी किंवा प्लेसमेंट एजन्सीकडून नोकरीच्या बदल्यात पैसे मागितल्यास सावध राहावे, संबंधित कंपनीची अधिकृत माहिती पडताळून पाहावी आणि कोणताही आर्थिक व्यवहार करण्यापूर्वी खात्री करावी, असे आवाहन पोलिसांनी केले आहे. सायबर फसवणुकीच्या वाढत्या घटनांच्या पार्श्वभूमीवर नागरिकांनी अधिक सतर्क राहण्याची गरज असल्याचेही पोलिसांनी स्पष्ट केले.