पुण्यात पुन्हा 'बिश्नोई गँग'ची दहशत! नामांकित व्यावसायिकाकडे २ कोटींची खंडणी

बिश्नोई गँग'च्या नावाने धमकीचा इंटरनेट कॉल

पोलिसांनी दिले

ल्या माहितीनुसार, शनिवारी सकाळी संबंधित व्यापाऱ्याला एका अज्ञात क्रमांकावरून इंटरनेट कॉल आला. कॉल करणाऱ्या व्यक्तीने स्वतःची ओळख 'शुभम लोणकर' अशी करून दिली. बाबा सिद्दीकी हत्याकांडातील फरार आरोपी आणि बिश्नोई गँगचा सक्रिय सदस्य असल्याचा दावा करत त्याने व्यापाऱ्याशी संवाद साधला.

धमकी देणाऱ्या व्यक्तीने व्यापाऱ्याचा बांधकाम व्यवसाय, त्याच्या आलिशान गाडीचा क्रमांक आणि रोजच्या हालचालींची संपूर्ण माहिती असल्याचे सांगितले. त्यामुळे हा कॉल केवळ धमकीपुरता नसून व्यापाऱ्यावर मानसिक दबाव निर्माण करण्याचा प्रयत्न असल्याचेही बोलले जात आहे.

स्वतःची काळजी घे... २ कोटी तयार ठेव

या कॉलदरम्यान आरोपीने व्यापाऱ्याच्या कुटुंबातील सदस्यांची नावे घेत त्यांच्या हालचालींबाबतही माहिती असल्याचे सांगितले. त्यामुळे व्यापारी आणि त्यांच्या कुटुंबीयांमध्ये मोठी भीती निर्माण झाली.

स्वतःची काळजी घे... २ कोटी रुपये तयार ठेव. पुढील सूचना लवकरच दिल्या जातील," असा इशारा देत आरोपीने व्यापाऱ्याला थेट जीवे मारण्याची धमकी दिली आणि त्यानंतर फोन कट केला.

व्यापाऱ्याची पोलिसांकडे धाव

घटनेनंतर घाबरलेल्या व्यापाऱ्याने तत्काळ "उत्तमनगर पोलीस ठाण्यात" तक्रार दाखल केली. पोलिसांनी अज्ञात व्यक्तीविरोधात गुन्हा नोंदवत तपासाला सुरुवात केली आहे. इंटरनेट कॉलचा स्त्रोत शोधण्यासाठी गुन्हे शाखेची विशेष पथके कामाला लागली असून, तांत्रिक तपासाद्वारे कॉल करणाऱ्या व्यक्तीचा माग काढण्याचे प्रयत्न सुरू आहेत.

तसेच, धमकी देणाऱ्या व्यक्तीचा प्रत्यक्षात "बिश्नोई गँगशी काही संबंध आहे का, की केवळ त्या नावाचा गैरवापर करून खंडणी उकळण्याचा प्रयत्न करण्यात आला, याचाही तपास पोलिसांकडून केला जात आहे.

आठवड्यातील तिसरी घटना; पोलिस सतर्क

दरम्यान, वानवडी, वाडकी आणि आता उत्तमनगर अशा सलग तीन घटनांमुळे पुणे पोलिसांची चिंता वाढली आहे. गेल्या काही दिवसांत 'बिश्नोई गँग'च्या नावाने व्यावसायिकांना धमकावून खंडणी मागण्याच्या घटना वाढत असल्याने या प्रकरणाकडे विशेष लक्ष देण्यात आले आहे.

व्यावसायिकांच्या सुरक्षेच्या दृष्टीने पोलिसांनी खबरदारी वाढवली असून, अशा प्रकारचे धमकीचे फोन किंवा संदेश आल्यास तात्काळ पोलिसांशी संपर्क साधण्याचे आवाहन करण्यात आले आहे. या प्रकरणामागे खरोखर संघटित गुन्हेगारी टोळीचा हात आहे की काही जण बिश्नोई गँगचे नाव वापरून भीतीचे वातावरण निर्माण करत आहेत, याचा उलगडा तपासानंतरच होणार आहे.