KBC चे 14 प्रश्न जिंकले, पण दुष्काळाच्या प्रश्नाने हरवलं! 50 लाख जिंकणाऱ्या शेतकऱ्याची कहाणी

छत्रपती संभाजीनगर : अमिताभ बच्चन यांच्यासमोर 'कौन बनेगा करोडपती'च्या हॉटसीटवर बसून 50 लाख रुपये जिंकणारे शेतकरी कैलास कुंटेवार आज दुष्काळाशी झुंज देत आहेत. केबीसीमध्ये 14 प्रश्नांची अचूक उत्तरं देत त्यांनी लाखोंची रक्कम जिंकली. मात्र, निसर्गापुढे त्यांच्या मेहनतीचं आणि पैशांचं गणित बिघडलं आहे.

पैठण तालुक्यातील गावतांडा गावचे कैलास कुंटेवार यांच्याकडे अवघी दोन एकर शेती आहे. यापूर्वी स्वतःच्या शेतात राबण्यासोबतच दुसऱ्याच्या शेतात मजुरी करून ते कुटुंबाचा उदरनिर्वाह करत होते. केबीसीमध्ये 50 लाख रुपये जिंकल्यानंतर त्यांनी शेती सुधारण्याचं स्वप्न पाहिलं. जिंकलेल्या पैशांतून शेतीत गुंतवणूक केली आणि पाण्यासाठी विहीरही खोदली. मात्र, विहिरीला पाणीच लागलं नाही.

कापसाला बोंडं नाहीत, सोयाबीनला दाणे नाहीत!

कैलास यांनी यंदा कापूस आणि सोयाबीनची लागवड केली होती. मात्र, पाण्याअभावी कापसाला बोंडं लागली नाहीत, तर सोयाबीनचंही मोठं नुकसान झालं. बियाणं, खतं, औषधं आणि मशागतीवर केलेला खर्च वाया गेल्याने त्यांच्यासमोर आर्थिक संकट उभं राहिलं आहे. शेतीत पैसे गुंतवूनही उत्पन्न मिळत नसल्याने पुढील हंगामाची तयारी कशी करायची, असा प्रश्न त्यांना सतावत आहे.

केबीसीने दिली आशा, दुष्काळाने हिरावलं स्वप्न!

केबीसीमध्ये मिळालेल्या पैशांमुळे कैलास यांच्या कुटुंबाला चांगल्या भविष्याची आशा निर्माण झाली होती. मात्र, पाण्याअभावी शेतीचं नुकसान झाल्याने त्यांच्या अडचणी वाढल्या आहेत. घरात आई-वडील, पत्नी आणि मुलांची जबाबदारी असताना शेतीतून उत्पन्न मिळत नसल्याने कुटुंबाचा खर्च भागवण्याचं आव्हान त्यांच्यासमोर आहे.

कैलास यांची ही व्यथा केवळ एका शेतकऱ्यापुरती मर्यादित नाही. मराठवाड्यातील अनेक शेतकरी पाणीटंचाई आणि पिकांच्या नुकसानीमुळे अडचणीत सापडले आहेत. अशा परिस्थितीत नुकसानग्रस्त शेतकऱ्यांना तातडीची आर्थिक मदत, पाण्याचं योग्य नियोजन आणि पुढील हंगामासाठी आधार मिळण्याची गरज व्यक्त होत आहे.

केबीसीमध्ये 50 लाख रुपये जिंकणाऱ्या कैलास कुंटेवार यांच्यासमोर आज मात्र एकच प्रश्न उभा आहे, तो म्हणजे शेती पुन्हा उभी कशी करायची? विहीर कोरडी आणि पिकं उद्ध्वस्त झाल्याने दुष्काळाने त्यांच्या स्वप्नांनाच मोठा धक्का दिला आहे.