सिया गोयल आणि चेतन चौधरी ह्यांना १४ दिवसाची न्यायालयीन कोठडी

पुणे : पुण्यातील गाजत असलेल्या केतन अग्रवाल हत्या प्रकरणात मोठी घडामोड समोर आली आहे. आरोपी सिया गोयल आणि तिचा प्रियकर चेतन चौधरी यांना वडगाव मावळ न्यायालयाने १४ दिवसांची न्यायालयीन कोठडी सुनावली आहे. पोलिसांनी त्यांची कोठडी वाढवून देण्याची मागणी केली होती, मात्र न्यायालयाने ती फेटाळली.

पोलिसांच्या कोठडीदरम्यान या दोघांची सखोल चौकशी करण्यात आली. तपासासाठी त्यांना लुल्लानगरमधील कॅफे आणि लोहगड येथे नेऊन गुन्ह्याची पुनर्निर्मिती करण्यात आली. घटनाक्रम स्पष्ट करण्यासाठी ही प्रक्रिया महत्त्वाची मानली जात आहे. त्याचबरोबर, सिया गोयलच्या कोंढवा येथील घरातून घटनेच्या दिवशी तिने परिधान केलेले कपडेही पोलिसांनी जप्त केले.

तपासादरम्यान फॉरेन्सिक लॅबच्या मदतीने डिलीट करण्यात आलेला मोबाईल डेटा देखील रिकव्हर करण्यात आला आहे. त्यामुळे या प्रकरणातील डिजिटल पुरावे आता पोलिसांसाठी अधिक महत्त्वाचे ठरत आहेत. कॉल डिटेल्स, चॅट्स, लोकेशन हिस्ट्री आणि मोबाईलमधील रिकव्हर झालेली माहिती यांच्या आधारे तपासाला नवी दिशा मिळण्याची शक्यता आहे.

केतन अग्रवाल यांचा मृत्यू सुरुवातीला अपघात वाटत होता. मात्र, तपास पुढे सरकताच हे प्रकरण खुनाच्या कटाकडे वळले. याच पार्श्वभूमीवर सिया गोयल आणि चेतन चौधरी यांच्यावर संशय बळावला. पोलिसांनी आतापर्यंत जप्त केलेले पुरावे, घटनास्थळी केलेले निरीक्षण आणि चौकशीतून मिळालेली माहिती तपासाच्या केंद्रस्थानी ठेवली आहे.

दरम्यान, न्यायालयीन कोठडी सुनावल्यानंतर दोन्ही आरोपींना तुरुंगात पाठवण्यात आले आहे. पुढील चौकशी आणि न्यायालयीन प्रक्रिया यावर या प्रकरणाचे भवितव्य अवलंबून असेल. तपास यंत्रणांकडून अजूनही या प्रकरणातील काही महत्त्वाच्या बाबींची पडताळणी सुरू आहे.

या प्रकरणामुळे पुण्यात खळबळ उडाली असून, केतन अग्रवाल यांच्या मृत्यूमागील संपूर्ण सत्य समोर येण्याकडे सर्वांचे लक्ष लागले आहे.