पुण्यात बांधकाम व्यावसायिकाची आत्महत्या; माजी आमदार रविंद्र धंगेकर , मनसे नेते बाळा शेडगे ह्यांच्यावर आत्महत्येस प्रवृत्त केल्याचे गंभीर आरोप

पुणे : पुण्यातील बांधकाम व्यावसायिक आणि कंत्राटदार खलील शेख यांनी गळफास घेऊन आत्महत्या केल्याची धक्कादायक घटना समोर आली आहे. आत्महत्येपूर्वी रेकॉर्ड केलेल्या व्हिडिओमध्ये त्यांनी आर्थिक अडचणी, वाढलेले कर्ज आणि काही व्यावसायिक व्यवहारांतील अडथळे यांचा उल्लेख केला आहे. या प्रकरणामुळे माजी आमदार रविंद्र धंगेकर आणि त्यांच्या पत्नी प्रतिभा धंगेकर यांच्याशी संबंधित बांधकाम प्रकल्प पुन्हा चर्चेत आला आहे.

मिळालेल्या माहितीनुसार, पुण्यातील लक्ष्मी रस्त्यावरील वक्फ बोर्डाशी संबंधित जमिनीवर बांधकाम प्रकल्प उभारण्यासाठी 'उत्कर्ष असोसिएट' नावाची कंपनी स्थापन करण्यात आली होती. या कंपनीत प्रतिभा धंगेकर, मनसेचे माजी नगरसेवक बाळा शेडगे यांच्यासह इतर भागीदारांचा समावेश होता. खलील शेख हे या प्रकल्पाशी बांधकाम व्यावसायिक आणि कंत्राटदार म्हणून जोडले गेले होते.

दरम्यान, वक्फ बोर्डाकडून प्रकल्पाला स्थगिती मिळाल्यानंतर हे प्रकरण न्यायालयात गेले आणि बांधकाम रखडले. प्रकल्प बंद पडल्याने आर्थिक व्यवहार विस्कळीत झाले आणि कर्जाचा बोजा वाढल्याचा दावा खलील शेख यांनी आत्महत्येपूर्वीच्या व्हिडिओमध्ये केला आहे.

व्हिडिओमध्ये खलील शेख यांनी आपली सुमारे ५० लाख रुपयांची देणी अडकून असल्याचा आरोप केला आहे. तसेच काही भागीदारांकडून पैसे मिळाले नसल्यामुळे स्वतःला कर्जाचे व्याज भरावे लागत असल्याचे त्यांनी म्हटले आहे. याशिवाय, माजी नगरसेवक बाळा शेडगे यांनी धमक्या दिल्याचाही गंभीर आरोप त्यांनी व्हिडिओमध्ये केला आहे. आपल्या कुटुंबाला भविष्यात कोणताही त्रास झाल्यास त्यासाठी संबंधित व्यक्तींना जबाबदार धरावे, असेही त्यांनी या व्हिडिओत म्हटले आहे.

या आरोपांबाबत संबंधितांकडून अद्याप अधिकृत प्रतिक्रिया किंवा पोलिस तपासाचा निष्कर्ष समोर आलेला नाही. त्यामुळे या आरोपांची स्वतंत्रपणे पुष्टी झालेली नाही.

दरम्यान, माजी आमदार रविंद्र धंगेकर यांनी या घटनेवर प्रतिक्रिया देताना सांगितले की, वक्फ बोर्डाच्या कारवाईमुळे प्रकल्प दीर्घकाळ बंद राहिला आणि त्यामुळे आर्थिक संकट निर्माण झाले. "खलील शेख यांच्यावर विविध कर्जांचा मोठा बोजा होता. प्रकल्प थांबल्यामुळे अनेकांचे आर्थिक नुकसान झाले," असे धंगेकर यांनी म्हटले आहे.

या प्रकरणी पोलिसांकडून आत्महत्येचे कारण, व्हिडिओतील आरोप आणि आर्थिक व्यवहारांची सखोल चौकशी सुरू असून तपासानंतरच संपूर्ण सत्य समोर येणार आहे.