लातूर हादरलं! तरुणाला विवस्त्र करून अमानुष मारहाण; संतापजनक कृत्याचा व्हिडिओ व्हायरल!

लातूर : लातूरमध्ये माणुसकीला काळिमा फासणारी एक संतापजनक घटना समोर आली आहे. काही जणांच्या टोळक्याने एका तरुणाला नग्न करून पट्ट्याने आणि लाथाबुक्क्यांनी बेदम मारहाण केल्याचा प्रकार उघडकीस आला आहे. एवढ्यावरच न थांबता तरुणाच्या पार्श्वभागात पेट्रोल टाकल्याचाही गंभीर आरोप करण्यात आला आहे. विशेष म्हणजे, या संपूर्ण प्रकाराचा मोबाईलवर व्हिडिओ तयार करून तो सोशल मीडियावरील काही ग्रुपमध्ये व्हायरल करण्यात आल्याची माहिती समोर आली आहे. या घटनेमुळे लातूरमध्ये खळबळ उडाली असून, पोलिसांनी आरोपींचा शोध सुरू केला आहे.

तरुणाला नग्न करून पट्ट्याने मारहाण; अमानुष कृत्याचा व्हिडिओ व्हायरल

मिळालेल्या माहितीनुसार, काही जणांनी एका तरुणाला पकडून त्याचे कपडे काढले. त्यानंतर त्याला पट्ट्याने आणि लाथाबुक्क्यांनी बेदम मारहाण करण्यात आली. याचदरम्यान तरुणाच्या पार्श्वभागात पेट्रोल टाकल्याचाही आरोप आहे. मारहाण करणाऱ्या टोळक्यातील काही जणांनी हा संपूर्ण प्रकार मोबाईलमध्ये चित्रित केल्याचे सांगण्यात येत आहे. त्यानंतर हा व्हिडिओ सोशल मीडियावरील काही ग्रुपमध्ये प्रसारित करण्यात आल्याची माहिती आहे.

हा व्हिडिओ समोर आल्यानंतर घटनेचे गांभीर्य लक्षात घेऊन पोलिसांनी तपासाची चक्रे फिरवली आहेत. संबंधित तरुणाला अशा प्रकारे मारहाण करण्यामागे नेमके कोणते कारण होते, याबाबत अद्याप स्पष्ट माहिती समोर आलेली नाही.

पोलिसांची कारवाई सुरू; एक संशयित ताब्यात, अन्य आरोपी फरार

या घटनेची माहिती मिळताच स्थानिक गुन्हे शाखा आणि एमआयडीसी पोलीस ठाण्याच्या पथकांनी संशयितांचा शोध सुरू केला. प्राथमिक माहितीनुसार, पोलिसांनी एका संशयिताला ताब्यात घेतले असून, या प्रकरणाशी संबंधित अन्य तीन ते चार जण फरार असल्याचे सांगण्यात येत आहे. त्यांचा शोध घेण्यासाठी पोलिसांकडून प्रयत्न सुरू आहेत.

दरम्यान, ही घटना काही महिन्यांपूर्वी घडल्याची माहिती समोर येत आहे. मात्र, मारहाणीची नेमकी तारीख अद्याप स्पष्ट झालेली नाही. संबंधित व्हिडिओ अलीकडे व्हायरल झाल्यानंतर हा प्रकार उघडकीस आल्याचे सांगण्यात येत आहे.

मारहाणीमागील कारण काय? पोलिसांकडून तपास सुरू

या प्रकरणात अनेक प्रश्न उपस्थित झाले आहेत. संबंधित तरुणाला नग्न करून मारहाण का करण्यात आली? या घटनेमागे पूर्ववैमनस्य होते की अन्य काही कारण? मारहाणीचा व्हिडिओ तयार करून तो सोशल मीडियावर प्रसारित करण्यामागे नेमका कोणता उद्देश होता? या सर्व बाबींचा पोलीस तपास करत आहेत.

दरम्यान, या घटनेतील सर्व संशयितांची भूमिका, मारहाणीमागील कारण आणि व्हिडिओ प्रसारित करण्यामागचा उद्देश याबाबत अधिकृत तपासातून स्पष्टता येणे अपेक्षित आहे. तरुणासोबत झालेल्या कथित अमानुष कृत्यामुळे लातूरमध्ये संताप व्यक्त होत असून, फरार संशयितांना पकडण्याचे आव्हान पोलिसांसमोर आहे.