अमराठी रिक्षाचालकांना मराठी शिकण्यासाठी आणखी एक वर्ष; परिवहन मंत्र्यांचा स्पष्ट इशारा

मुंबई : महाराष्ट्रात रिक्षा-टॅक्सी व्यवसाय करणाऱ्या अमराठी चालकांच्या मराठी भाषेच्या मुद्द्यावर राज्य सरकारने महत्त्वाचा निर्णय घेतला आहे. मुख्यमंत्री देवेंद्र फडणवीस यांनी चालकांना जुजबी मराठी शिकण्यासाठी आणखी एक वर्षाची मुदत दिली आहे. मात्र, ही मुदत संपल्यानंतर पुन्हा कोणतीही मुदतवाढ दिली जाणार नसल्याचे संकेत परिवहन मंत्री प्रताप सरनाईक यांनी दिले आहेत.

अमराठी रिक्षा आणि टॅक्सी चालकांच्या शिष्टमंडळाने मुख्यमंत्र्यांची भेट घेऊन मराठी शिकण्यासाठी अधिक वेळ देण्याची मागणी केली होती. त्यानंतर मुख्यमंत्र्यांनी चालकांना एका वर्षाची मुदतवाढ देण्याचा निर्णय घेतला. या कालावधीत मराठी न येण्याच्या कारणावरून संबंधित चालकांवर कारवाई केली जाणार नाही, असेही स्पष्ट करण्यात आले.

मुख्यमंत्र्यांच्या निर्णयानंतर परिवहन मंत्री प्रताप सरनाईक यांनी सरकारची भूमिका स्पष्ट केली. महाराष्ट्रात राहून व्यवसाय करायचा असल्यास प्रत्येकाने किमान जुजबी मराठी शिकणे आवश्यक असल्याचे त्यांनी सांगितले. मुख्यमंत्र्यांनी दिलेली एक वर्षाची मुदत ही अंतिम संधी मानून चालकांनी या काळात मराठी शिकावी, असे सरनाईक यांनी स्पष्ट केले.

यापूर्वीच्या नियमांनुसार, नोटीस मिळाल्यानंतर चालकाला मराठी शिकण्यासाठी ठराविक कालावधी देण्यात येत होता. त्यानंतरही मराठीचे आवश्यक ज्ञान नसल्यास परवान्यावर कारवाई होण्याची तरतूद होती. मात्र, आता मुख्यमंत्र्यांच्या निर्णयामुळे चालकांना तयारीसाठी आणखी एक वर्ष मिळणार आहे.

विशेष म्हणजे, मराठी भाषा शिकण्यासंदर्भातील हा नियम नवीन नसल्याचेही प्रताप सरनाईक यांनी सांगितले. 1989 पासून या विषयाशी संबंधित नियम अस्तित्वात असून, अनेक वर्षांपासून त्याची अंमलबजावणी करण्याचा प्रयत्न सुरू आहे. त्यामुळे आता मिळालेल्या एका वर्षाच्या मुदतीचा उपयोग करून चालकांनी मराठी शिकणे अपेक्षित आहे.

1 लाख 60 हजार चालकांनी शिकली जुजबी मराठी

उपमुख्यमंत्री एकनाथ शिंदे यांनीही या निर्णयावर प्रतिक्रिया दिली. आतापर्यंत सुमारे 1 लाख 60 हजार अमराठी चालकांनी जुजबी मराठी शिकल्याचे त्यांनी सांगितले. त्यापैकी 20 ते 30 हजार चालकांना कांदिवली येथे आयोजित कार्यक्रमात मराठी भाषा शिकल्याचे प्रमाणपत्र देण्यात आल्याची माहिती त्यांनी दिली.

मराठी भाषा दैनंदिन व्यवहारात अधिकाधिक वापरली जावी आणि अन्य भाषिकांनीही ती शिकावी, अशी भूमिका परिवहन विभागाने घेतली आहे. त्यामुळे नव्या मुदतवाढीनंतर अमराठी रिक्षा आणि टॅक्सी चालक किती लवकर मराठी आत्मसात करतात, याकडे आता लक्ष लागले आहे.