मुंबई-पुणे एक्सप्रेसवेवरील ‘मिसिंग लिंक’जवळ मोठी दरड; पुण्याहून मुंबईकडे वाहतूक बंद, वाहने जुन्या महामार्गावर वळवली

मुंबई-पुणे एक्सप्रेसवेवरील 'मिसिंग लिंक' प्रकल्पात दरड कोसळली

पुणे: मुंबई-पुणे एक्सप्रेसवेवरील नव्या 'मिसिंग लिंक' प्रकल्पात खंडाळा एक्झिटजवळील बोगदा क्रमांक २ बाहेर सोमवारी (६ जुलै) पहाटे मुसळधार पावसामुळे मोठी दरड कोसळली. दरड कोसळल्याने पुलावर आणि रस्त्यावर मोठ्या प्रमाणात माती, दगड आणि मलबा साचला असून सुरक्षिततेच्या कारणास्तव पुण्याहून मुंबईच्या दिशेने जाणारी वाहतूक तातडीने बंद करण्यात आली आहे.सुदैवाने, दरड कोसळली त्यावेळी त्या मार्गावर कोणतेही वाहन नसल्यामुळे कोणतीही जीवितहानी झालेली नाही.

वाहतुकीची सद्यस्थिती

महामार्ग प्रशासनाने दिलेल्या माहितीनुसार मुंबईहून पुण्याकडे येणारी वाहतूक मिसिंग लिंकमार्गे पूर्ववत सुरू करण्यात आली आहे. मात्र पुण्याहून मुंबईकडे जाणाऱ्या वाहनांसाठी हा मार्ग अद्याप बंद ठेवण्यात आला आहे.

रस्ता सुरक्षित होईपर्यंत आणि दरड पूर्णपणे हटविण्याचे काम पूर्ण होईपर्यंत पुण्याहून मुंबईच्या दिशेने जाणारी वाहतूक सुरू केली जाणार नाही.

जुन्या मुंबई-पुणे महामार्गावर वाहतूक वळवली

मिसिंग लिंक आणि संबंधित उड्डाणपूल बंद असल्याने पुण्याहून मुंबईकडे जाणारी सर्व वाहने जुन्या मुंबई-पुणे राष्ट्रीय महामार्ग (NH-48) मार्गे वळविण्यात आली आहेत. त्यामुळे या मार्गावर वाहतुकीचा ताण वाढण्याची शक्यता असून वाहनचालकांनी अतिरिक्त वेळ गृहीत धरून प्रवासाचे नियोजन करण्याचा सल्ला प्रशासनाने दिला आहे.

युद्धपातळीवर रस्ता साफ करण्याचे काम सुरू

दरड हटविण्यासाठी आणि महामार्गावरील वाहतूक पूर्ववत करण्यासाठी संबंधित यंत्रणा युद्धपातळीवर काम करत आहेत. जेसीबी आणि इतर अवजड यंत्रसामग्रीच्या सहाय्याने रस्त्यावर पडलेला मलबा हटविण्याचे काम सुरू असून परिस्थितीवर सातत्याने लक्ष ठेवण्यात येत आहे.

वाहनचालकांसाठी प्रशासनाचे आवाहन

मुंबईच्या दिशेने प्रवास करणाऱ्या वाहनचालकांनी जुन्या मुंबई-पुणे महामार्गाचा वापर करावा. अनावश्यक प्रवास टाळावा, वाहतूक पोलिसांच्या सूचनांचे पालन करावे आणि अधिकृत वाहतूक अपडेट्सनुसारच प्रवासाचे नियोजन करावे, असे आवाहन प्रशासनाने केले आहे.