आशियाई क्रीडा स्पर्धेआधी भारताला मोठा धक्का; नीरज चोप्राची दुखापतीमुळे माघार, उर्वरित हंगामही संपला!

नवी दिल्ली : भारताचा स्टार भालाफेकपटू नीरज चोप्रा याच्याबाबत एक मोठी आणि धक्कादायक बातमी समोर आली आहे. आगामी आशियाई क्रीडा स्पर्धेआधीच नीरज चोप्राने दुखापतीमुळे मोठा निर्णय घेतला आहे. प्रशिक्षणादरम्यान घोट्याला झालेल्या दुखापतीनंतर नीरजने उर्वरित हंगामातून माघार घेण्याची घोषणा केली आहे.

विशेष म्हणजे, काही दिवसांपूर्वीच नीरजने यंदाच्या हंगामातील आपला सर्वोत्तम थ्रो नोंदवला होता. 21 ऑगस्ट रोजी लॉजेन डायमंड लीगमध्ये त्याने 88.05 मीटरची भालाफेक केली होती. या कामगिरीनंतर नीरज पुन्हा आपल्या जुन्या लयीत परतत असल्याचे चित्र निर्माण झाले होते. मात्र, त्यानंतर झालेल्या दुखापतीने त्याच्या हंगामावरच प्रश्नचिन्ह निर्माण झाले.

नीरजने सोशल मीडियावर पोस्ट करत आपल्या दुखापतीची माहिती दिली. "लॉजेनमध्ये हंगामातील सर्वोत्तम थ्रो केल्यानंतर मला वाटलं की मी लय मिळवण्याच्या जवळ आलो आहे. मात्र, त्यानंतर काही वेळाने माझ्या घोट्याला दुखापत झाली," असे नीरजने सांगितले.

डॉक्टर आणि आपल्या टीमसोबत चर्चा केल्यानंतर उर्वरित हंगामात सहभागी न होण्याचा निर्णय घेतल्याचेही त्याने स्पष्ट केले. दुखापत झाल्यामुळे निराशा झाली असली तरी आता पूर्णपणे बरे होऊन ताकदीने पुनरागमन करण्यावर लक्ष केंद्रित करणार असल्याचे नीरजने म्हटले आहे.

आशियाई क्रीडा स्पर्धेत भारताला मोठा धक्का

नीरजच्या पोस्टमध्ये थेट आशियाई क्रीडा स्पर्धेतून माघार घेतल्याचा उल्लेख नसला, तरी त्याने संपूर्ण उर्वरित हंगामातून माघार घेतल्याचे स्पष्ट केले आहे. त्यामुळे आगामी आशियाई क्रीडा स्पर्धेत नीरज सहभागी होणार नसल्याचे स्पष्ट झाले आहे.

नीरजसाठी आशियाई क्रीडा स्पर्धेचे विशेष महत्त्व आहे. 2023 मध्ये चीनमधील हांगझोऊ येथे झालेल्या आशियाई क्रीडा स्पर्धेत त्याने 88.88 मीटरची भालाफेक करत सुवर्णपदक पटकावले होते. त्याच स्पर्धेत भारताच्या किशोर जेना याने रौप्यपदक जिंकले होते.

याआधीही नीरजने आशियाई क्रीडा स्पर्धेतील सुवर्णपदकावर आपले नाव कोरले होते. त्यामुळे सलग दोन आशियाई क्रीडा स्पर्धांमध्ये सुवर्णपदक जिंकलेल्या भारताच्या या स्टार खेळाडूची आगामी स्पर्धेतील अनुपस्थिती हा भारतीय क्रीडा विश्वासाठी मोठा धक्का आहे.

हंगामातील सर्वोत्तम थ्रो केल्यानंतर काही दिवसांतच दुखापत... आणि त्यानंतर संपूर्ण हंगामातून माघार! आता नीरज चोप्राच्या पुनरागमनाकडे सर्वांचे लक्ष लागले आहे.