NEET पेपर लीक प्रकरणाला नवे वळण; आरोपीच्या मोबाईलमध्ये सापडले 132 प्रश्न

नवी दिल्ली : NEET-UG 2026 पेपर लीक प्रकरणाच्या तपासात केंद्रीय अन्वेषण विभाग (CBI)च्या हाती महत्त्वाचे डिजिटल पुरावे लागले आहेत. या प्रकरणातील आरोपी शिवराज मोटेगावकरच्या मोबाईलच्या फॉरेन्सिक तपासात केमिस्ट्री विषयाचे तब्बल 132 प्रश्न सापडले आहेत. हे प्रश्न परीक्षेपूर्वीच त्याच्याकडे आले होते. हे प्रश्न मिळवण्यासाठी त्याने सुमारे 5 लाख रुपये दिल्याची माहिती तपासातून समोर आली आहे.

CBIच्या प्राथमिक तपासानुसार, NEET-UG परीक्षेपूर्वी प्रश्नपत्रिकेतील प्रश्न एका संघटित रॅकेटमार्फत काही विद्यार्थ्यांपर्यंत पोहोचवले जात होते. या रॅकेटमध्ये दलाल, शिक्षक, मध्यस्थ आणि इतर काही व्यक्तींचा सहभाग असल्याचा संशय आहे. या प्रकरणाचा तपास सध्या अनेक राज्यांमध्ये सुरू असून, संबंधित संशयितांची चौकशी केली जात आहे. काही विद्यार्थ्यांनी 2 लाख ते 5 लाख रुपये देऊन प्रश्नपत्रिका मिळवल्याची माहितीही तपासादरम्यान समोर आली आहे.

तपासादरम्यान शिवराज मोटेगावकरच्या मोबाईलमधील चॅट, कॉल रेकॉर्ड, आर्थिक व्यवहार आणि इतर डिजिटल पुरावे CBIकडून तपासले जात आहेत. या पुराव्यांच्या आधारे पेपर लीक रॅकेटमधील इतर सदस्यांचा शोध घेतला जात आहे. या गैरव्यवहारामध्ये आणखी काही लोकांचा सहभाग असण्याची शक्यता तपास यंत्रणांनी व्यक्त केली असून, आर्थिक व्यवहारांची साखळीही तपासली जात आहे.

देशातील सर्वात महत्त्वाच्या वैद्यकीय प्रवेश परीक्षांपैकी एक असलेल्या NEET-UGमध्ये झालेल्या या कथित पेपर लीकमुळे लाखो विद्यार्थी आणि पालकांमध्ये संतापाचे वातावरण आहे. परीक्षेच्या पारदर्शकतेवर आणि विश्वासार्हतेवर गंभीर प्रश्न उपस्थित झाले असून, या प्रकरणात आतापर्यंत अनेक आरोपींना अटक करण्यात आली आहे. CBIचा तपास वेगाने सुरू असून, येत्या काही दिवसांत या प्रकरणात आणखी धक्कादायक खुलासे होण्याची शक्यता वर्तवली जात आहे.