ऑनलाइन ट्रेडिंगमध्ये पैसे गुंतवण्यासाठी घरफोडी; कोंढव्यातील १९ वर्षीय तरुण अटक

पुणे : शेअर बाजारातील ऑनलाइन ट्रेडिंगमधून कमी वेळेत मोठा नफा कमावण्याच्या हव्यासापोटी शेजाऱ्याच्याच घरात घरफोडी करणाऱ्या १९ वर्षीय तरुणाला येवलेवाडी पोलिसांनी अटक केली आहे. अत्यंत शिताफीने चोरी करणाऱ्या या आरोपीने गुन्हा लपवण्यासाठी सीसीटीव्ही कॅमेरे बंद करण्याचाही प्रयत्न केला होता. मात्र पोलिसांच्या कसून तपासामुळे त्याचा डाव उधळला गेला. आरोपीकडून चोरीतील सोन्याचे दागिने आणि चांदीचे नाणे जप्त करण्यात आले असून, या प्रकरणाचा पुढील तपास सुरू आहे.

अटक करण्यात आलेल्या आरोपीचे नाव प्रतीक राजेंद्र शर्मा वय १९, रा. कमलप्रभा सोसायटी, कान्हा हॉटेलजवळ, कोंढवा बुद्रुक असे आहे. याप्रकरणी येवलेवाडी पोलीस ठाण्यात एका नागरिकाने घरफोडीची तक्रार दाखल केली होती. त्यानुसार पोलिसांनी गुन्हा दाखल करून तपासाची चक्रे वेगाने फिरवली.

पोलिसांनी दिलेल्या माहितीनुसार, फिर्यादी कामानिमित्त घराबाहेर जाताना त्यांच्या फ्लॅटची चावी सोसायटीच्या रखवालदाराकडे ठेवत असत. ही बाब आरोपीला आधीपासूनच माहिती होती. त्याने या विश्वासाचा गैरफायदा घेत रखवालदाराच्या ड्रॉवरचे कुलूप तोडले आणि फ्लॅटची चावी चोरली. त्यानंतर कोणालाही संशय येऊ नये म्हणून शांतपणे फ्लॅटचे कुलूप उघडून घरात प्रवेश केला. घरातील सोन्याचे दागिने आणि चांदीचे नाणे चोरून तो पसार झाला.

गुन्हा उघडकीस आल्यानंतर येवलेवाडी पोलिसांनी घटनास्थळाची पाहणी करत परिसरातील सीसीटीव्ही फुटेज तपासण्यास सुरुवात केली. मात्र काही सीसीटीव्ही कॅमेरे बंद असल्याचे दिसून आले. याशिवाय तक्रारदाराच्या फ्लॅटबाहेरील एका कॅमेऱ्याच्या लेन्सवर मुद्दाम चिखल फासण्यात आल्याचेही पोलिसांच्या निदर्शनास आले. त्यामुळे चोरी करणारी व्यक्ती ही परिसराशी परिचित असून पुरावे नष्ट करण्याचा प्रयत्न करत असल्याचा संशय पोलिसांना आला.

तपास पथकाने त्यानंतर सीसीटीव्ही बंद होण्यापूर्वीचे फुटेज बारकाईने तपासले. त्यामध्ये प्रतीक शर्मा हा संशयास्पद हालचाली करताना दिसून आला. तांत्रिक तपास आणि गोपनीय माहितीच्या आधारे पोलिसांनी त्याला ताब्यात घेतले. चौकशीदरम्यान सुरुवातीला त्याने उडवाउडवीची उत्तरे दिली. मात्र पोलिसांनी पुरावे समोर ठेवल्यानंतर त्याने गुन्ह्याची कबुली दिली.

आरोपीने रखवालदाराच्या ड्रॉवरमधून चावी चोरून शेजाऱ्याच्या घरात चोरी केल्याचे कबूल केले. तसेच शेअर बाजारातील ऑनलाइन ट्रेडिंगमध्ये पैसे गुंतवण्यासाठी मोठ्या रकमेची गरज असल्याने चोरीचा मार्ग स्वीकारल्याचेही त्याने सांगितले. ऑनलाइन ट्रेडिंगमधून झटपट पैसे मिळतील, या मोहापोटी त्याने हा गुन्हा केल्याचे तपासात समोर आले.

पोलिसांनी आरोपीकडून चोरीतील मुद्देमाल जप्त केला असून, या प्रकरणात आणखी काही गुन्ह्यांमध्ये त्याचा सहभाग आहे का, याचाही तपास सुरू आहे. तसेच चोरीसाठी वापरलेली साधने आणि इतर बाबींचाही शोध घेतला जात आहे.

ही कारवाई पोलीस उपायुक्त राजलक्ष्मी शिवणकर, सहायक पोलीस आयुक्त राम इंगवले यांच्या मार्गदर्शनाखाली वरिष्ठ पोलीस निरीक्षक मारुती पाटील, पोलीस निरीक्षक (गुन्हे) दीपक कारंडे, पोलीस उपनिरीक्षक आकाश विटे तसेच त्यांच्या पथकाने यशस्वीरीत्या पार पाडली. आरोपीविरुद्ध संबंधित कलमान्वये गुन्हा दाखल करण्यात आला असून पुढील तपास येवलेवाडी पोलीस करत आहेत.