पुण्यात ७२२ अमराठी रिक्षाचालकांनी घेतले मराठीचे धडे; प्रशिक्षणानंतर मिळाले प्रमाणपत्र

पुणे | १७ ऑगस्ट २०२६ : महाराष्ट्रात रिक्षा व्यवसाय करणाऱ्या अमराठी भाषिक रिक्षाचालकांना प्रवाशांशी दैनंदिन व्यवहार करताना सहज संवाद साधता यावा, यासाठी सुरू करण्यात आलेल्या मराठी भाषा प्रशिक्षण उपक्रमाला पुण्यात चांगला प्रतिसाद मिळाला आहे. या उपक्रमांतर्गत पुण्यातील ७२२ रिक्षाचालकांनी मराठी भाषा प्रशिक्षण पूर्ण करून प्रमाणपत्र मिळवले आहे.

महाराष्ट्राचे परिवहन मंत्री प्रताप सरनाईक आणि परिवहन विभागाच्या पुढाकाराने राज्यभर हा उपक्रम राबवण्यात आला. महाराष्ट्र शासन परिवहन विभाग, राज्य मराठी विकास संस्था, कोकण मराठी साहित्य परिषद आणि मुंबई मराठी साहित्य संघ यांच्या सहकार्याने हा प्रशिक्षण उपक्रम आयोजित करण्यात आला. डॉ. ज्योती ठाकरे यांच्या नेतृत्वाखाली रिक्षाचालकांना व्यवहारात उपयोगी पडणाऱ्या मराठी भाषेचे प्रशिक्षण देण्यात आले.

पुणे प्रादेशिक परिवहन कार्यालयात रिक्षाचालकांसाठी घेण्यात आलेल्या प्रशिक्षणात दैनंदिन व्यवहारातील मराठी शब्द, वाक्यरचना आणि प्रवाशांशी संवाद साधताना आवश्यक असलेल्या भाषेवर विशेष भर देण्यात आला. रिक्षाचालकांना प्रवाशांशी संवाद साधताना अडचणी येऊ नयेत आणि भाषेच्या माध्यमातून प्रवासी व चालक यांच्यातील संवाद अधिक सुलभ व्हावा, हा या उपक्रमाचा मुख्य उद्देश होता.

या प्रशिक्षणासाठी प्रादेशिक परिवहन अधिकारी अर्चना गायकवाड, उपप्रादेशिक परिवहन अधिकारी स्वप्निल भोसले आणि सहाय्यक प्रादेशिक परिवहन अधिकारी विंदा गुरावे यांच्या सहकार्याने RTO अधिकाऱ्यांनी प्रशिक्षण प्रक्रिया राबवली.

प्रशिक्षण पूर्ण झाल्यानंतर रिक्षाचालकांची तोंडी परीक्षा घेण्यात आली. या परीक्षेत उत्तीर्ण झालेल्या ७२२ रिक्षाचालकांना १७ ऑगस्ट रोजी पुणे RTOच्या सहकार सभागृहात प्रमाणपत्रांचे वितरण करण्यात आले. यावेळी १०० हून अधिक रिक्षाचालकांनी प्रत्यक्ष उपस्थित राहून प्रमाणपत्र स्वीकारले.

दरम्यान, पुणे आणि पिंपरी-चिंचवड परिसरातील ३५० पेक्षा अधिक रिक्षाचालकांनी अद्याप मराठी भाषा प्रशिक्षण घेतलेले नाही, अशी माहिती संघटनेच्या वतीने देण्यात आली आहे. उर्वरित रिक्षाचालकांसाठी विशेष प्रशिक्षण वर्ग आयोजित करण्यात यावेत आणि प्रशिक्षणानंतर परीक्षा घेऊन उत्तीर्ण चालकांना प्रमाणपत्र देण्यात यावे, अशी मागणी आझाद रिक्षा चालक संघटनेचे संस्थापक अध्यक्ष शफिक भाई पटेल यांनी केली आहे.

मराठी भाषा शिकल्यामुळे प्रवाशांशी संवाद साधणे अधिक सोपे होत असल्याची भावना प्रशिक्षण पूर्ण केलेल्या काही रिक्षाचालकांनी व्यक्त केली. स्थानिक भाषा शिकल्यामुळे प्रवाशांच्या गरजा समजून घेणे सोपे होते, गैरसमज टाळता येतात आणि महाराष्ट्राच्या संस्कृतीशी जोडले जाण्याची संधी मिळते, असेही रिक्षाचालकांनी सांगितले.

पुण्यात ७२२ रिक्षाचालकांनी मराठी भाषा प्रशिक्षण पूर्ण करून प्रमाणपत्र मिळवल्याने या उपक्रमाला मिळालेला प्रतिसाद स्पष्ट झाला आहे. आता उर्वरित रिक्षाचालकांनाही प्रशिक्षण देण्यासाठी विशेष वर्ग आयोजित करण्याची मागणी होत असून, या माध्यमातून रिक्षाचालक आणि प्रवाशांमधील संवाद अधिक प्रभावी होण्यास मदत होणार आहे.