रेड अलर्टमुळे पुणे शहर आणि जिल्ह्यातील सर्व शाळांना ६ जुलै रोजी सुट्टी; जिल्हाधिकाऱ्यांचे आदेश

पुणे : पुणे जिल्ह्यासाठी भारतीय हवामान विभागाने रविवार, ६ जुलै रोजी 'रेड अलर्ट' जारी केला असून जिल्ह्यात काही भागांत मुसळधार ते अतिमुसळधार, तर काही ठिकाणी अत्यंत मुसळधार पावसाची शक्यता वर्तवण्यात आली आहे. या पार्श्वभूमीवर विद्यार्थ्यांच्या सुरक्षिततेचा विचार करून पुणे शहर आणि पुणे जिल्हा (ग्रामीण) परिसरातील सर्व शाळा आणि अंगणवाड्यांना सोमवार, ६ जुलै २०२६ रोजी सुट्टी जाहीर करण्यात आली आहे. यासंदर्भातील आदेश जिल्हाधिकारी जितेंद्र डुडी यांनी जारी केले आहेत.

जिल्हा प्रशासनाने जारी केलेल्या आदेशानुसार, पुणे शहरासह ग्रामीण भागातील सर्व अंगणवाड्या तसेच प्राथमिक, माध्यमिक आणि उच्च माध्यमिक स्तरावरील सर्व माध्यमांच्या शाळा सोमवार, ६ जुलै रोजी बंद राहतील. संभाव्य अतिवृष्टीमुळे विद्यार्थ्यांच्या जीवितास धोका निर्माण होऊ नये आणि सुरक्षिततेला सर्वोच्च प्राधान्य देता यावे, यासाठी हा निर्णय घेण्यात आल्याचे प्रशासनाने स्पष्ट केले आहे.

मात्र, शाळांचे मुख्याध्यापक, शिक्षक आणि शिक्षकेत्तर कर्मचाऱ्यांना नियमित कार्यालयीन वेळेत उपस्थित राहण्याचे निर्देश देण्यात आले आहेत. स्थानिक प्रशासनाकडून आवश्यकतेनुसार आपत्ती व्यवस्थापनाशी संबंधित कामकाजासाठी त्यांना सज्ज राहण्यास सांगण्यात आले आहे.

दरम्यान, जिल्हा प्रशासनाने नागरिकांना देखील सतर्कतेचे आवाहन केले आहे. अनावश्यक प्रवास टाळावा, नदी-नाले, धबधबे तसेच पाण्याचा वेग जास्त असलेल्या भागांमध्ये जाणे टाळावे आणि प्रशासन तसेच भारतीय हवामान विभागाकडून वेळोवेळी जारी करण्यात येणाऱ्या सूचनांचे काटेकोरपणे पालन करावे, असे आवाहन करण्यात आले आहे.

हवामान विभागाने पुढील काही तास आणि दिवसांत पावसाचा जोर कायम राहण्याची शक्यता व्यक्त केल्याने प्रशासनाने यंत्रणांना सतर्क राहण्याच्या सूचना दिल्या असून नागरिकांनीही खबरदारी घेण्याचे आवाहन करण्यात आले आहे.