पुण्यात रंगांची उधळण, बालप्रतिभेचा गौरव! श्री महालक्ष्मी मंदिराच्या चित्रकला स्पर्धेत आराध्य-सईची बाजी

पुणे : नवरात्रोत्सव २०२६ निमित्त पुण्यातील सारसबाग येथील श्री महालक्ष्मी मंदिराच्या वतीने आयोजित आंतरशालेय चित्रकला स्पर्धेत विद्यार्थ्यांच्या कल्पनाशक्तीचा अनोखा आविष्कार पाहायला मिळाला. विविध शाळांमधील हजारो विद्यार्थ्यांनी या स्पर्धेत सहभाग नोंदवत आपल्या कलागुणांचे प्रदर्शन केले. इयत्ता पाचवी ते सातवी गटात आराध्य लांडे, तर आठवी ते दहावी गटात सई लांडगे यांनी प्रथम क्रमांक पटकावला. विजेत्यांना एकूण १ लाख ६ हजार रुपयांची पारितोषिके प्रदान करून गौरविण्यात आले.

कल्पनाशक्तीला चालना देणारे अनोखे विषय

विद्यार्थ्यांच्या सर्जनशीलतेला वाव मिळावा, या उद्देशाने स्पर्धेसाठी ‘प्राणी बोलू शकले तर’, ‘भिंती नसलेले ग्रंथालय’ आणि ‘जगाशी कनेक्टेड, आयुष्यापासून डिस्कनेक्टेड’ असे तीन आगळेवेगळे विषय देण्यात आले होते. विद्यार्थ्यांनी आपल्या चित्रांमधून विविध कल्पना, सामाजिक संदेश आणि भावविश्व प्रभावीपणे मांडले. या स्पर्धेचे परीक्षण अनंत डेरे आणि निताली हरगुडे यांनी केले.

आराध्य लांडे आणि सई लांडगे यांची बाजी

इयत्ता पाचवी ते सातवी गटात अभिनव विद्यालयाच्या आराध्य लांडे याने प्रथम क्रमांक मिळवला. जी. आर. पालकर प्राथमिक शाळेच्या कार्तिक पाटील याने द्वितीय, तर वाकड येथील विस्डम वर्ल्ड स्कूलच्या रिद्धी साहू हिने तृतीय क्रमांक पटकावला.

इयत्ता आठवी ते दहावी गटात ज्ञानेश विद्यालयाच्या सई लांडगे हिने प्रथम क्रमांक मिळवला. सेंट मिराज विद्यालयाच्या सानुजा पाटील हिने द्वितीय, तर ज्ञानवर्धिनी विद्यालयाच्या समृद्धी बारटक्के हिने तृतीय क्रमांक मिळवला.

विशेष विभागात सार्थक सिंग याने प्रथम, तर अंश परचे याने द्वितीय क्रमांक पटकावला. याशिवाय दोन विद्यार्थ्यांना विशेष पारितोषिक देऊन सन्मानित करण्यात आले.

पुण्यातील विविध शाळांमध्ये स्पर्धेचे आयोजन

ही स्पर्धा विश्वकर्मा विद्यालय, बिबवेवाडी; युनिव्हर्सल विस्डम स्कूल, बालेवाडी; विस्डम वर्ल्ड स्कूल, वाकड आणि हडपसर; महेश विद्यालय, कर्वे रोड तसेच मॉडेल स्कूल, शिवाजीनगर येथे आयोजित करण्यात आली होती. विविध शाळांमधील हजारो विद्यार्थ्यांनी या उपक्रमाला उत्स्फूर्त प्रतिसाद दिला.

मान्यवरांच्या उपस्थितीत विजेत्यांचा गौरव

सारसबाग येथील श्री महालक्ष्मी मंदिरात आयोजित कार्यक्रमाला पोलीस अधिकारी मिलिंद मोहिते, स्वप्ना गोरे, मंदिराचे विश्वस्त भरत अग्रवाल, उत्सव प्रमुख डॉ. तृप्ती अग्रवाल, ॲड. प्रताप परदेशी आणि प्रवीण चोरबेले उपस्थित होते.

मंदिराचे संस्थापक व प्रमुख विश्वस्त राजकुमार अग्रवाल आणि प्रमुख विश्वस्त अमिता अग्रवाल यांच्या मार्गदर्शनाखाली हा उपक्रम पार पडला. विद्यार्थ्यांच्या कलागुणांना प्रोत्साहन देणाऱ्या या स्पर्धेतून नवोदित बालकलाकारांना आपली प्रतिभा सादर करण्याची संधी मिळाली.