‘मग तुम्ही त्यांना पोसत आहात का?’ टायगर श्रॉफ हल्ला प्रकरणावर राज ठाकरेंचा सरकारला थेट सवाल!

मुंबई : अभिनेता टायगर श्रॉफवरील हल्ल्याच्या घटनेनंतर मुंबईतील कायदा-सुव्यवस्थेचा मुद्दा पुन्हा चर्चेत आला आहे. या प्रकरणात लॉरेन्स बिष्णोई गँगने हल्ल्याची जबाबदारी स्वीकारल्याचा दावा सोशल मीडियावर करण्यात आल्याने खळबळ उडाली. या पार्श्वभूमीवर महाराष्ट्र नवनिर्माण सेनेचे अध्यक्ष राज ठाकरे यांनी सरकारच्या भूमिकेवर प्रश्न उपस्थित करत कठोर शब्दांत प्रतिक्रिया दिली.

हल्ल्यानंतर पोलिसांनी तपासाची चक्रे वेगाने फिरवत आरोपींना अटक केल्याची माहिती समोर आली आहे. मात्र, तुरुंगात असलेल्या गुन्हेगारांच्या नावाने अशा प्रकारचे दावे केले जात असतील, तर कायदा-सुव्यवस्थेच्या दृष्टीने हा गंभीर प्रश्न असल्याचं राज ठाकरे यांच्या वक्तव्यावरून स्पष्ट झालं.

‘जेलमधून बाहेर काढून फटकवायला पाहिजे’

लॉरेन्स बिष्णोई आणि टायगर श्रॉफवरील हल्ल्यासंदर्भात विचारलेल्या प्रश्नावर राज ठाकरे यांनी उपरोधिक टिप्पणी करत सत्ताधाऱ्यांना लक्ष्य केलं. ‘साबरमती के संत, तूने कर दिया कमाल,’ असं म्हणत त्यांनी केंद्रीय गृहमंत्र्यांवरही निशाणा साधला.

भाजप विरोधात असताना अशा घटना घडल्या असत्या, तर पक्षाने कोणती भूमिका घेतली असती, असा सवाल त्यांनी उपस्थित केला. विरोधात असताना वेगळी भूमिका आणि सत्तेत आल्यानंतर वेगळी भूमिका घेतली जात असल्याची टीकाही त्यांनी केली.

‘आम्ही कारवाई केली, असं सांगत आहेत; मात्र बंदोबस्त होत नाही. जेलमधून बाहेर काढून त्याला फटकवायला पाहिजे. भीती नाही, मग तुम्ही त्यांना पोसत आहात का?’ अशा शब्दांत राज ठाकरे यांनी संताप व्यक्त केला.

‘देशात लॉ आहे, पण ऑर्डर नाही’

देशातील कायदा-सुव्यवस्थेवर भाष्य करताना राज ठाकरे यांनी मुंबई आणि महाराष्ट्र पोलिसांवर पूर्ण विश्वास असल्याचं सांगितलं. पोलिसांना राजकीय हस्तक्षेपापासून दूर ठेवलं पाहिजे, असंही त्यांनी स्पष्ट केलं.

गुन्हेगारी नियंत्रणात आणण्यासाठी पोलीस यंत्रणेला स्वतंत्रपणे काम करू देणं आवश्यक असल्याचं त्यांनी अधोरेखित केलं. देशात कायदे आहेत, मात्र त्यांची प्रभावी अंमलबजावणी आणि सुव्यवस्थेबाबत प्रश्न निर्माण होत असल्याचं त्यांनी म्हटलं.

‘प्रत्येकाच्या मनात राग साचला आहे’

देशातील सध्याच्या परिस्थितीवर बोलताना राज ठाकरे यांनी नागरिकांमध्ये अस्वस्थता आणि नाराजी वाढत असल्याचा दावा केला. पत्रकार, विद्यार्थी, गृहिणी अशा विविध घटकांमध्ये राग साचलेला आहे आणि तो कधीतरी बाहेर येऊ शकतो, असं त्यांनी म्हटलं.

‘उगाच कोणी आगी लावत फिरत नाही, रावणाची लंका उगाच नव्हती जळली,’ असं म्हणत त्यांनी समाजातील वाढत्या असंतोषाकडे लक्ष वेधलं.

टायगर श्रॉफवरील हल्ल्याच्या प्रकरणामुळे केवळ सेलिब्रिटींच्या सुरक्षेचाच नव्हे, तर गुन्हेगारी टोळ्यांवर नियंत्रण ठेवण्याच्या यंत्रणेचाही मुद्दा ऐरणीवर आला आहे. या पार्श्वभूमीवर राज ठाकरे यांच्या वक्तव्यामुळे सरकारच्या कायदा-सुव्यवस्थेच्या धोरणावर नव्याने चर्चा सुरू होण्याची शक्यता आहे.