'ती माझी नाही तर...' एकतर्फी प्रेमातून तरुणीची हत्या? सिंधुदुर्गात संतापाची लाट!

सिंधुदुर्ग : सिंधुदुर्ग जिल्ह्यातील कुडाळ तालुक्यात एकतर्फी प्रेमातून महाविद्यालयीन तरुणीची निर्घृण हत्या झाल्याची धक्कादायक घटना समोर आली आहे. वर्दे-कडावल परिसरात घरी परतणाऱ्या दामिनी किरण पालव हिच्यावर धारदार शस्त्राने वार करून तिची हत्या करण्यात आली. या प्रकरणातील संशयित आरोपी साहिल धुरी याला सिंधुदुर्ग पोलिसांच्या स्थानिक गुन्हे अन्वेषण शाखेने अटक केली आहे. या घटनेमुळे परिसरात खळबळ उडाली असून महिला सुरक्षेचा प्रश्न पुन्हा ऐरणीवर आला आहे.

सोशल मीडियावरील ओळख ठरली हत्येमागील कारण?

प्राथमिक माहितीनुसार, दामिनी पालव आणि संशयित साहिल धुरी यांची ओळख सोशल मीडियाच्या माध्यमातून झाली होती. या ओळखीनंतर साहिलचे दामिनीवर एकतर्फी प्रेम जडले होते. मात्र, दामिनीने त्याच्या प्रेमाला प्रतिसाद दिला नव्हता.

दरम्यान, दामिनीचे लग्न ठरल्याची माहिती साहिलला मिळाल्यानंतर तो संतापला होता. प्रेमाला नकार आणि लग्न ठरल्याच्या रागातून त्याने हत्येचे टोकाचे पाऊल उचलल्याचा संशय व्यक्त करण्यात येत आहे. मात्र, हत्येमागील नेमके कारण पोलीस तपासातून स्पष्ट होणार आहे.

कॉलेजमधून घरी जाताना अडवली वाट

शनिवारी (१७ ऑक्टोबर) दामिनी महाविद्यालयातून एसटी बसने गावात परतली होती. बसमधून उतरून ती घराकडे पायी जात असताना संशयित आरोपी तिची वाट पाहत थांबला होता, अशी माहिती समोर आली आहे.

आरोपीने दामिनीची वाट अडवून तिला प्रेम स्वीकारण्याचा आग्रह धरल्याचे सांगण्यात येत आहे. मात्र, तिने नकार दिल्यानंतर तिच्यावर धारदार शस्त्राने वार करण्यात आले. या हल्ल्यात दामिनीचा मृत्यू झाला. या घटनेने वर्दे परिसरात संताप आणि हळहळ व्यक्त होत आहे.

संशयित आरोपीला पोलिसांनी ठोकल्या बेड्या

घटनेनंतर संशयित आरोपी घटनास्थळावरून फरार झाला होता. हत्येचे गांभीर्य लक्षात घेऊन सिंधुदुर्ग पोलिसांनी त्याचा शोध सुरू केला. स्थानिक गुन्हे अन्वेषण शाखा आणि स्थानिक पोलिसांच्या तपासानंतर साहिल धुरी याला वेंगुर्ले परिसरातून अटक करण्यात आली.

वृत्तानुसार, पोलिसांनी तपासादरम्यान संशयिताचे रक्ताचे डाग असलेले कपडे ताब्यात घेतले आहेत. तसेच सीसीटीव्ही फुटेज आणि इतर तांत्रिक पुराव्यांच्या आधारे तपास सुरू आहे. आरोपीची चौकशी करून हत्येमागील नेमका घटनाक्रम स्पष्ट करण्याचा पोलिसांचा प्रयत्न आहे.

महिला सुरक्षेचा प्रश्न पुन्हा ऐरणीवर

महाविद्यालयातून घरी परतणाऱ्या तरुणीची दिवसाढवळ्या हत्या झाल्याने परिसरात भीतीचे वातावरण निर्माण झाले आहे. प्रेमाला नकार देण्याच्या कारणातून तरुणीचा जीव घेतल्याच्या संशयामुळे महिलांच्या सुरक्षिततेबाबत गंभीर प्रश्न उपस्थित झाले आहेत.

या प्रकरणातील सर्व पुरावे गोळा करून दोषीविरुद्ध कठोर कायदेशीर कारवाई करण्याची अपेक्षा व्यक्त होत आहे. दरम्यान, सिंधुदुर्ग पोलीस या प्रकरणाचा अधिक तपास करत आहेत.