“अब हिंदू माफ नहीं करेगा!” उद्धव ठाकरेंचा भाजपवर आक्रोश, दादरमध्ये रामरक्षा आंदोलन जाहीर"

मुंबई : अयोध्येतील श्रीराम मंदिराच्या दानपेटी आणि देणगी निधीबाबत कथित अपहाराचा मुद्दा पुन्हा एकदा राजकीय वादाच्या केंद्रस्थानी आला आहे. शिवसेना उद्धव बाळासाहेब ठाकरे पक्षाचे प्रमुख उद्धव ठाकरे यांनी मुंबईत घेतलेल्या पत्रकार परिषदेत भारतीय जनता पक्षावर अत्यंत आक्रमक शब्दांत टीका केली. राम मंदिराच्या निधीवर भाजपने दरोडा टाकल्याचा आरोप करत त्यांनी भाजपवर थेट निशाणा साधला.

या प्रकरणात भाजपला जबाबदार धरत उद्धव ठाकरे यांनी येत्या रविवार, ५ जुलै रोजी दादरमधील हनुमान मंदिराजवळ ‘रामरक्षा’ आंदोलन करण्याची घोषणा केली. या आंदोलनातून राम मंदिराच्या निधीबाबत जाब विचारला जाणार असल्याचे त्यांनी स्पष्ट केले.

पत्रकार परिषदेत बोलताना उद्धव ठाकरे म्हणाले की, भारतीय जनता पक्षाने हिंदुत्वाचा वापर राजकीय स्वार्थासाठी केला. त्यांच्या मते, ज्या आंदोलनातून भाजप उभा राहिला, त्या काळात देशातील अनेक हिंदूंनी मोठा संघर्ष आणि वेदना सहन केल्या. कारसेवा, गोध्रानंतरचे हिंसाचार, अहमदाबाद दंगल आणि मुंबईतील घडामोडींचा उल्लेख करत त्यांनी हिंदूंवरील अन्यायाचा मुद्दा अधोरेखित केला.

उद्धव ठाकरे यांनी पुढे प्रश्न उपस्थित केला की, आज राम मंदिराच्या नावाखालीच वेगळे ‘ऑपरेशन’ सुरू झाले आहे का? राजकीय पक्ष फोडणे, आमदारांना पळवणे, खरेदी-विक्री करणे आणि त्याला ‘ऑपरेशन’ असे नाव देणे हे सुरू असल्याचा आरोप त्यांनी केला. राम मंदिराच्या निधीवर दरोडा टाकण्यात आल्याचे पुरावे असल्याचा दावाही त्यांनी केला.

ते म्हणाले की, काही जणांच्या म्हणण्यानुसार चोरीचा पैसा पक्ष फोडण्यासाठी वापरला जात आहे, हे अत्यंत गंभीर आहे. मंदिराच्या नावाने होणाऱ्या कथित लुटीविरोधात आता हिंदूंनी गप्प न बसता आवाज उठवला पाहिजे, असेही त्यांनी नमूद केले.

उद्धव ठाकरे यांनी आंदोलनाची भूमिका स्पष्ट करताना सांगितले की, ५ जुलै रोजी दादर येथे हनुमान मंदिरासमोर शिवसेनेचे नेते, लोकप्रतिनिधी आणि हिंदुत्वावर श्रद्धा असलेले सर्वजण एकत्र येतील. पक्षभेद न ठेवता, रामभक्तांनी या आंदोलनात सहभागी व्हावे, असे आवाहन त्यांनी केले.

या ठिकाणी रामरक्षा, हनुमान स्तोत्र आणि हनुमान चालीसा पठण केले जाणार असल्याचेही त्यांनी सांगितले. पुढे राज्यभरातील राम मंदिर, हनुमान मंदिर, शहरांपासून खेड्यांपर्यंत अशा सर्व ठिकाणी हिंदू आणि रामभक्तांनी एकत्र यावे, अशी हाक त्यांनी दिली.

उद्धव ठाकरे यांच्या म्हणण्यानुसार, आता या कथित लुटीविरोधात केवळ शिवसैनिक नव्हे, तर बाळासाहेब ठाकरेंचे विचार न सोडलेले सर्व हिंदू एकत्र येतील, असा त्यांचा विश्वास आहे. वारकरी आणि रामभक्तांनीही या मुद्द्यावर एकजूट दाखवावी, असे आवाहन त्यांनी केले.