उंड्रीतील फ्लॅटमध्ये रसायनांचा स्फोट; विनापरवाना स्फोटक पदार्थ बाळगल्याप्रकरणी गुन्हा

पुणे : उंड्री परिसरातील एका निवासी फ्लॅटमध्ये रसायने मिसळताना झालेल्या स्फोटामुळे परिसरात खळबळ उडाली आहे. या घटनेत फ्लॅटमधील एक व्यक्ती जखमी झाली असून, त्यांच्या निष्काळजीपणामुळे इमारतीतील इतर रहिवाशांच्या जीविताला आणि मालमत्तेलाही धोका निर्माण झाल्याचा आरोप करत काळेपडळ पोलिसांनी संबंधित व्यक्तीविरुद्ध गुन्हा दाखल केला आहे. सध्या या स्फोटामागील नेमके कारण आणि फ्लॅटमध्ये ठेवण्यात आलेल्या रसायनांचा उद्देश काय होता, याचा तपास सुरू आहे.

पोलिसांनी दिलेल्या माहितीनुसार, ६ जुलै २०२६ रोजी दुपारी साडेबारा वाजण्याच्या सुमारास कानडेनगर बसस्टॉपजवळील पूर्वा सोसायटी, उंड्री येथील फ्लॅटमध्ये किशोर चंद्रकांत कापडिया (वय ५५) हे काही रसायने एकत्र मिसळत होते. त्यांच्या ताब्यात पोटॅशिअम नायट्रेट आणि टायटॅनियम डायऑक्साइड ही रसायने आढळून आली. ही रसायने ठेवण्यासाठी किंवा वापरण्यासाठी आवश्यक असलेला कोणताही वैध परवाना त्यांच्याकडे नव्हता, असे पोलिसांनी सांगितले.

प्राथमिक तपासात ही रसायने ग्राईंडरमध्ये एकत्र फिरवित असताना अचानक स्फोट झाल्याचे समोर आले आहे. स्फोटात कापडिया जखमी झाले. स्फोटाचा आवाज मोठा असल्याने परिसरातील नागरिक घाबरले आणि काही काळ सोसायटीत भीतीचे वातावरण निर्माण झाले. सुदैवाने या घटनेत इतर कोणतीही जीवितहानी झाली नाही. मात्र, हा स्फोट अधिक मोठा झाला असता तर मोठी दुर्घटना घडू शकली असती, असेही पोलिसांचे म्हणणे आहे.

घटनेची माहिती मिळताच काळेपडळ पोलिसांनी तातडीने घटनास्थळी धाव घेतली. पोलिसांनी फ्लॅटची पाहणी करून पंचनामा केला तसेच तेथील रसायने आणि इतर साहित्य तपासासाठी ताब्यात घेतले. स्फोट नेमका कशामुळे झाला आणि त्यामागे कोणते तांत्रिक कारण होते, याचाही तपास सुरू आहे.

या प्रकरणी काळेपडळ पोलीस ठाण्यात गुन्हा क्रमांक ३०६/२०२६ दाखल करण्यात आला आहे. भारतीय न्याय संहिता (बीएनएस) कलम २८८, १२५(अ)(ब) तसेच स्फोटक पदार्थ अधिनियम, १८८४ च्या कलम ९-ब(१)(ब) अंतर्गत गुन्हा नोंदविण्यात आला आहे.

दरम्यान, फ्लॅटमध्ये आढळलेली रसायने कोणत्या कारणासाठी आणण्यात आली होती, त्यांचा वापर कशासाठी होणार होता, ती कुठून खरेदी करण्यात आली आणि या प्रकरणात आणखी कोणाचा सहभाग आहे का, याचा तपास सहाय्यक पोलीस निरीक्षक अमित शेटे करत आहेत. तपास पूर्ण झाल्यानंतर या स्फोटामागील नेमके कारण स्पष्ट होणार असल्याचे पोलिसांनी सांगितले आहे