दारूच्या नशेत झोपलेल्या पतीची पत्नीने गळा आवळून हत्या? हृदयविकाराचा झटका आल्याचा बनाव उघड

कर्नाटक : कर्नाटकातील म्हैसूर (Mysuru) मध्ये जून २०२६ च्या अखेरीस घडलेल्या हत्येच्या प्रकरणात, एका ५० वर्षीय व्यक्तीची (नित्यानंद) त्याच्याच पत्नीने (सुशीला) गळा आवळून हत्या केली आणि त्यानंतर त्याला हृदयविकाराचा झटका (Heart Attack) आल्याचा बनाव रचला होता. दारूच्या नशेत झोपलेल्या पतीचा पत्नीने दोरीने गळा आवळून खून केल्याचा आरोप समोर आला आहे. त्यानंतर हा मृत्यू नैसर्गिक असल्याचे भासवण्यासाठी हृदयविकाराचा झटका आल्याचा बनाव करण्यात आल्याचे पोलिस तपासात उघड झाले आहे.

मृत नित्यानंद हा महिंद्रा शोरूममध्ये कर्मचारी म्हणून कार्यरत होता. रविवारी रात्री तो मद्यप्राशन करून उशिरा घरी परतला. पोलिसांच्या प्राथमिक तपासानुसार, तो झोपल्यानंतर त्याची पत्नी सुशीला, जी एका खासगी शाळेत शिक्षिका आहे, हिने दोरीच्या सहाय्याने त्याचा गळा आवळून हत्या केली.

त्यानंतर दुसऱ्या दिवशी सकाळी सुशीला घरातच राहिली आणि वारंवार दार ठोठावूनही तिने दार उघडले नाही. नित्यानंदशी संपर्क होत नसल्याने त्याचा मित्र दर्शन त्याच्या घरी गेला, मात्र त्यालाही कोणताही प्रतिसाद मिळाला नाही.

काही वेळानंतर सुशीलाने नित्यानंदच्या भावाला फोन करून त्याचा हृदयविकाराच्या झटक्याने मृत्यू झाल्याची माहिती दिली. मात्र, घटनास्थळी पोहोचल्यानंतर कुटुंबीयांनी नित्यानंदच्या मानेवर जखमेच्या खुणा पाहिल्या. त्यामुळे त्यांना संशय आला आणि त्यांनी पोलिसांकडे तक्रार दाखल केली.

पोलिसांनी घटनास्थळी तपास करून मृतदेह शवविच्छेदनासाठी पाठवला. प्राथमिक चौकशीदरम्यान सुशीलाने गुन्ह्याची कबुली दिल्याचा दावा पोलिसांनी केला आहे. या कबुलीजबाबानंतर पोलिसांनी पुढील तपासाला वेग दिला आहे.

पोलिसांच्या माहितीनुसार, पती-पत्नीमध्ये अनेक दिवसांपासून कौटुंबिक वाद सुरू होते. वैवाहिक मतभेद, अपत्य नसणे, आर्थिक अडचणी आणि मालमत्तेच्या वादातून हे हत्याकांड घडल्याचा संशय तपास यंत्रणांनी व्यक्त केला आहे.

या प्रकरणाचा पुढील तपास पोलीस करत असून, सर्व पुरावे आणि शवविच्छेदन अहवालाच्या आधारे पुढील कायदेशीर कारवाई करण्यात येणार आहे.