इमरान खानला मुंबई हायकोर्टाचा मोठा दिलासा! भारत सोडण्याच्या नोटीसला स्थगिती; नेमकं प्रकरण काय?

मुंबई : अभिनेता इमरान खान याला मुंबई हायकोर्टाने मोठा दिलासा दिला आहे. भारत सोडण्याची नोटीस देण्यात आल्यानंतर इमरान खानने या निर्णयाला न्यायालयात आव्हान दिलं होतं. या याचिकेवर सुनावणी करताना हायकोर्टाने नोटीसच्या अंमलबजावणीला अंतरिम स्थगिती दिली आहे. त्यामुळे पुढील सुनावणीपर्यंत इमरान खानला दिलासा मिळाला आहे.

या प्रकरणाच्या सुनावणीदरम्यान अतिरिक्त सॉलिसिटर जनरल यांनी सोमवारपर्यंत सुनावणी तहकूब करण्याची विनंती केली. तोपर्यंत अभिनेत्याविरोधात कोणतीही दंडात्मक कारवाई केली जाणार नसल्याचंही सांगण्यात आलं. न्यायालयाने पुढील सुनावणी 2 नोव्हेंबर रोजी दुपारी 3 वाजता निश्चित केली आहे.

इमरान खानला भारत सोडण्याची नोटीस का देण्यात आली?

या प्रकरणाची सुरुवात 10 ऑक्टोबर रोजी मुंबईतील ऑगस्ट क्रांती मैदानात झालेल्या आंदोलनापासून झाली. या आंदोलनात सहभागी झाल्यामुळे मुंबई पोलिसांनी इमरान खानला फॉरेनर्स अँड इमिग्रेशन कायद्याच्या तरतुदींचं उल्लंघन केल्याचा आरोप केला होता. त्यानंतर त्याला 28 ऑक्टोबरपर्यंत भारत सोडण्याची नोटीस बजावण्यात आली होती.

या नोटिशीविरोधात इमरान खानने मुंबई हायकोर्टात याचिका दाखल केली. ही नोटीस बेकायदेशीर, मनमानी आणि योग्य कारणांशिवाय गैरसमजातून बजावण्यात आल्याचा दावा त्याने याचिकेत केला आहे. आपल्याला या प्रकरणात बळीचा बकरा बनवलं जात असल्याचाही आरोप त्याने केला.

संविधानातील तरतुदींचा दिला दाखला

इमरान खानने आपल्या याचिकेत भारतीय संविधानाच्या अनुच्छेद 14 आणि 21 चा दाखला दिला आहे. भारतात वास्तव्यास असलेल्या परदेशी नागरिकांनाही या अनुच्छेदांनुसार संरक्षण मिळत असल्याचं त्याने म्हटलं आहे.

इमरान खान हा अमेरिकन नागरिक असून त्याच्याकडे ओव्हरसीज सिटिझन ऑफ इंडिया (OCI) कार्ड आहे. त्यामुळे भारत सोडण्याच्या नोटिशीला त्याने न्यायालयात आव्हान दिलं. आता या प्रकरणात पुढील सुनावणीदरम्यान न्यायालय काय भूमिका घेतं, याकडे लक्ष लागलं आहे.

इमरान खानच्या अभिनय कारकिर्दीची चर्चा

इमरान खानने 1988 मध्ये बालकलाकार म्हणून अभिनय क्षेत्रात पदार्पण केलं. त्यानंतर 2008 मध्ये ‘जाने तू... या जाने ना’ या चित्रपटातून त्याने मुख्य अभिनेता म्हणून प्रेक्षकांचं लक्ष वेधून घेतलं.

‘किडनॅप’, ‘ब्रेक के बाद’, ‘एक मैं और एक तू’, ‘मटरू की बिजली का मंडोला’, ‘गोरी तेरे प्यार में’, ‘बॉम्बे टॉकीज’ आणि ‘कट्टी बट्टी’ यांसारख्या चित्रपटांमध्ये त्याने काम केलं. 2015 नंतर तो चित्रपटांपासून दूर राहिला होता. त्यानंतर 2026 मध्ये ‘हॅप्पी पटेल: खतरनाक जासूस’ या चित्रपटातून त्याच्या पुनरागमनाची चर्चा झाली.

आता भारत सोडण्याच्या नोटिशीला हायकोर्टाने स्थगिती दिल्याने इमरान खानला तात्पुरता दिलासा मिळाला आहे. मात्र, या प्रकरणाचा अंतिम निर्णय पुढील सुनावणीनंतरच स्पष्ट होणार आहे.