तानाजी पाटील यांच्यावर महाराष्ट्राच्या अंडर-१४ फुटबॉल संघाची धुरा; फुलगावच्या सैनिकी शाळेचा गौरव

पुणे : महाराष्ट्राच्या १४ वर्षांखालील मुलांच्या फुटबॉल संघाच्या मुख्य प्रशिक्षकपदी फुलगाव येथील नेताजी सुभाषचंद्र बोस बॉईज मिलिटरी स्कूल अँड ज्युनियर कॉलेजचे क्रीडा विभाग प्रमुख आणि फुटबॉल प्रशिक्षक तानाजी पाटील यांची निवड झाली आहे. क्रीडा व युवक सेवा संचालनालयाच्या वतीने त्यांच्यावर ही महत्त्वाची जबाबदारी सोपविण्यात आली आहे. मध्य प्रदेश येथे होणाऱ्या राष्ट्रीय फुटबॉल स्पर्धेत ते महाराष्ट्राच्या संघाचे मुख्य प्रशिक्षक म्हणून काम पाहणार आहेत.

खेळाडूंना घडविण्यात मोलाचे योगदान

लोकसेवा प्रतिष्ठान संचलित या सैनिकी शाळेत क्रीडा विभाग प्रमुख म्हणून कार्यरत असलेल्या तानाजी पाटील यांनी अनेक शालेय खेळाडूंना शिस्तबद्ध आणि दर्जेदार फुटबॉल प्रशिक्षण दिले आहे. त्यांच्या मार्गदर्शनाखाली अनेक खेळाडूंनी राज्य आणि राष्ट्रीय स्तरावर उल्लेखनीय कामगिरी केली आहे. त्यांच्या क्रीडाक्षेत्रातील अनुभवाची, प्रशिक्षण कौशल्याची आणि खेळाडू घडविण्याच्या योगदानाची दखल घेत त्यांची महाराष्ट्राच्या संघाच्या मुख्य प्रशिक्षकपदी निवड करण्यात आली आहे.

या निवडीमुळे फुलगाव, कोल्हापूर आणि पुणे जिल्ह्यातील क्रीडाप्रेमींमध्ये आनंदाचे वातावरण असून, विविध स्तरांतून त्यांच्यावर अभिनंदनाचा वर्षाव होत आहे.

मान्यवरांच्या मार्गदर्शनातून यश

तानाजी पाटील यांच्या या यशामागे क्रीडा व युवक सेवा संचालनालयाचे माजी उपसंचालक जनक टेकाळे, पुणे जिल्हा क्रीडा अधिकारी जगन्नाथ लकडे, दादासाहेब देवकते तसेच मुख्यालयाचे क्रीडा मार्गदर्शक धीरज मिश्रा यांचे मोलाचे मार्गदर्शन लाभले.

लोकसेवा प्रतिष्ठानचे संस्थापक अध्यक्ष व माजी आमदार दीपक पायगुडे, सचिव विलास कसबे, संचालक वैदिक पायगुडे, शैक्षणिक संचालक नरहरी पाटील, कमांडंट मेजर विवेक रघुवंशी, सैनिकी शाळेचे प्राचार्य दीपक कांबळे, उपप्राचार्य विकास तिरकुंडी, लोकसेवा इंग्लिश मीडियम स्कूलचे प्राचार्य सुरेश पाटील, लोकसेवा फार्मसी कॉलेजचे उपप्राचार्य अफराज मुल्लानी, प्रशासन अधिकारी अर्जुन शिंदे आणि मिलिटरी इन्चार्ज मेजर कमल सिंग थापा यांचे प्रोत्साहन व सहकार्य त्यांना लाभले.

शाळेतील शिक्षक आणि शिक्षकेतर कर्मचाऱ्यांनीही तानाजी पाटील यांचे अभिनंदन केले आहे.

राष्ट्रीय स्पर्धेत महाराष्ट्राकडून मोठ्या अपेक्षा

मध्य प्रदेश येथे होणाऱ्या राष्ट्रीय फुटबॉल स्पर्धेत तानाजी पाटील यांच्या मार्गदर्शनाखाली महाराष्ट्राचा १४ वर्षांखालील संघ दमदार कामगिरी करेल, असा विश्वास क्रीडा क्षेत्रातून व्यक्त केला जात आहे. त्यांच्या निवडीमुळे लोकसेवा प्रतिष्ठान आणि सैनिकी शाळेच्या क्रीडा विभागाच्या शिरपेचात मानाचा तुरा खोवला गेला आहे.