प्रियकरासाठी पतीचा खून? छतावरून ढकलूनही बचावला; अखेर रुग्णालयात टॉयलेट क्लिनर इंजेक्ट करून हत्या केल्याचा आरोप

तेलंगणा: तेलंगणातील निजामाबाद जिल्ह्यातील न्यालकल गावात घडलेले एक धक्कादायक हत्याकांड. पोलिसांच्या तपासानुसार, परिचारिका (नर्स) असलेल्या एका महिलेने आपल्या कथित प्रियकरासह आणि आणखी एका साथीदाराच्या मदतीने पतीची हत्या केल्याचा आरोप आहे. विशेष म्हणजे, पहिल्या प्रयत्नात पतीचा जीव वाचल्यानंतर रुग्णालयात उपचार सुरू असताना त्याला टॉयलेट क्लिनर आणि इतर द्रव्य इंजेक्ट करून ठार मारल्याचा गंभीर आरोप पोलिसांनी केला आहे.

पोलिसांनी दिलेल्या माहितीनुसार, ३५ वर्षीय प्रशांत नुकताच गल्फ देशातून आपल्या गावी परतला होता. त्यानंतर त्याच्या पत्नी संध्या हिच्या कथित विवाहबाह्य संबंधांमध्ये तो अडथळा ठरत असल्याचे तपासात समोर आले. यानंतर संध्या, तिचा कथित प्रियकर अनिल आणि वेंकट साई उर्फ बंटी यांनी मिळून प्रशांतच्या हत्येचा कट रचल्याचा आरोप आहे.

तपासानुसार, २९ जून रोजी संध्याने बंटीला प्रशांतसोबत वेळ घालवण्यास आणि त्याला मद्यपान करण्यास प्रवृत्त करण्यास सांगितले. मद्यधुंद अवस्थेत दोघे इमारतीच्या छतावर गेले. तेथे झालेल्या वादानंतर बंटी आणि संध्या यांनी प्रशांतला छतावरून खाली ढकलल्याचा आरोप आहे. गंभीर जखमी झालेल्या प्रशांतला प्रथम सरकारी आणि नंतर खासगी रुग्णालयात दाखल करण्यात आले.

पोलिसांच्या म्हणण्यानुसार, पहिला कट अयशस्वी ठरल्यानंतर ३० जून रोजी नर्स म्हणून असलेल्या वैद्यकीय ज्ञानाचा वापर करून संध्याने रुग्णालयात उपचार सुरू असताना प्रशांतच्या हातातील कॅन्युलामधून टॉयलेट क्लिनर आणि इतर द्रव्य इंजेक्ट केले. त्यानंतर त्याचा मृत्यू झाला.

ही घटना प्रशांतच्या आईला संशय आल्याने उघडकीस आली. त्यांनी १ जुलै रोजी पोलिसांकडे तक्रार दाखल केली. चौकशीदरम्यान बंटीने आपला सहभाग मान्य केल्याचा दावा पोलिसांनी केला आहे.

या प्रकरणात पोलिसांनी ४ जुलै रोजी संध्या, तिचा कथित प्रियकर अनिल आणि वेंकट साई उर्फ बंटी यांना अटक केली. तिघांविरुद्ध हत्या आणि कट रचल्याप्रकरणी गुन्हा दाखल करण्यात आला असून न्यायालयाने त्यांना न्यायालयीन कोठडी सुनावली आहे. प्रकरणाचा पुढील तपास सुरू आहे.