आसाममध्ये CJPच्या ३० हून अधिक कार्यकर्त्यांना पोलिसांनी घेतले ताब्यात; अभिजीत दिपकेंचा मुख्यमंत्री हिमंत बिस्वा सरमांना आंदोलनाचा इशारा!

गुवाहाटी : आसाममधील गुवाहाटी येथे रविवारी (२७ सप्टेंबर २०२६) कॉकरोच जनता पार्टीच्या (CJP) प्रस्तावित प्रादेशिक स्वयंसेवक बैठकीपूर्वी आसाम पोलिसांनी पक्षाचे सह-संयोजक आशुतोष रांका यांच्यासह ३० हून अधिक कार्यकर्त्यांना ताब्यात घेतले. ताब्यात घेतलेल्यांमध्ये पक्षाच्या केंद्रीय समितीतील चार सदस्यांचाही समावेश असल्याचे वृत्त आहे. या कारवाईनंतर पक्षाचे संस्थापक अभिजीत दिपके यांनी आसामचे मुख्यमंत्री हिमंत बिस्वा सरमा यांना कार्यकर्त्यांची तातडीने सुटका करण्याची मागणी करत आंदोलनाचा इशारा दिला आहे.

खासगी निवासस्थानी बैठक घेण्यापूर्वीच कारवाई

सीजेपीची पहिली प्रादेशिक स्वयंसेवक बैठक रविवारी सकाळी १० वाजता गुवाहाटीतील आठगाव येथील आसाम श्री परशुराम सेवा सदन येथे आयोजित करण्यात आली होती. मात्र, मूळ ठिकाणचे बुकिंग रद्द करण्यासाठी दबाव आणण्यात आल्याचा आरोप आयोजकांनी केला आहे. त्यामुळे बैठकीचे ठिकाण बदलून आसाम सचिवालयासमोरील चौधरी टीला येथे करण्यात आले होते. तरीही बैठकीपूर्वी पोलिसांनी कार्यकर्त्यांना ताब्यात घेतल्याचे पक्षाचे म्हणणे आहे.

पोलिसांवर आशुतोष रांकांचे गंभीर आरोप

पोलिसांच्या ताब्यात असलेल्या आशुतोष रांका यांनी या कारवाईवर आक्षेप घेतला. खासगी जागेत शांततेत बैठक आयोजित केली असतानाही पोलिसांनी सकाळपासून पक्षाच्या कार्यकर्त्यांना ताब्यात घेण्यास सुरुवात केल्याचा आरोप त्यांनी केला. तसेच आसाममधील सरकारी शाळांची परिस्थिती आणि काझीरंगाशी संबंधित प्रश्न उपस्थित करण्यापासून रोखण्यासाठी ही कारवाई करण्यात आल्याचा दावाही त्यांनी केला.

अभिजीत दिपकेंचा मुख्यमंत्र्यांना आंदोलनाचा इशारा

या घटनेनंतर अभिजीत दिपके यांनी सोशल मीडिया प्लॅटफॉर्म एक्सवर पोस्ट करत आसाम पोलिसांच्या कारवाईचा निषेध केला. आशुतोष रांका आणि पक्षाच्या इतर सदस्यांना अज्ञात स्थळी नेण्यात येत असल्याचा दावा त्यांनी केला. कार्यकर्त्यांची तातडीने सुटका न झाल्यास पक्षाच्या सदस्यांसह आसाममध्ये येऊन आंदोलन करण्याचा इशाराही त्यांनी दिला आहे.

दरम्यान, कार्यकर्त्यांना कोणत्या कारणास्तव ताब्यात घेण्यात आले, याबाबत आसाम पोलिसांचे सविस्तर स्पष्टीकरण अद्याप समोर आलेले नाही. त्यामुळे या कारवाईबाबत पक्षाकडून उपस्थित करण्यात आलेल्या आरोपांवर पोलिसांची अधिकृत भूमिका महत्त्वाची ठरणार आहे