20 जनता पार्टी म्हणजे काय? सोशल मीडियावर चर्चेत आलेल्या नव्या अभियानाची देशभरात चर्चा

मुंबई : E20 (20 टक्के इथेनॉल मिश्रित) पेट्रोलबाबत देशभरात चर्चा सुरू असताना सोशल मीडियावर 'E20 जनता पार्टी' नावाचे एक नवे नागरिक अभियान चर्चेत आले आहे. हे कोणतेही नोंदणीकृत राजकीय पक्ष नसून, वाहनधारकांच्या हक्कांसाठी सुरू करण्यात आलेले डिजिटल अभियान असल्याचा दावा त्याच्या सोशल मीडिया पेजवर करण्यात आला आहे. या अभियानाची मुख्य मागणी म्हणजे देशातील प्रत्येक पेट्रोल पंपावर E20 पेट्रोलसोबत 100 टक्के शुद्ध (इथेनॉल-फ्री) पेट्रोलचाही पर्याय उपलब्ध करून द्यावा.

गेल्या काही दिवसांत या अभियानाला सोशल मीडियावर मोठा प्रतिसाद मिळत आहे. मीम्स, माहितीपूर्ण पोस्ट आणि व्यंगचित्रांच्या माध्यमातून E20 पेट्रोलबाबत जनजागृती केली जात असून, अनेक वाहनधारक या मोहिमेला पाठिंबा देत आहेत.

E20 जनता पार्टी म्हणजे काय?

E20 जनता पार्टी ही कोणतीही अधिकृत राजकीय संघटना नाही. 'X' (पूर्वीचे ट्विटर) आणि इन्स्टाग्रामवर सुरू झालेल्या या नागरिक अभियानाचा उद्देश वाहनधारकांच्या समस्या मांडणे आणि ग्राहकांच्या निवडीच्या अधिकारासाठी आवाज उठवणे हा आहे. या अभियानाचा E20 पेट्रोलला विरोध नसून, ग्राहकांना E20 आणि इथेनॉल-फ्री पेट्रोल या दोन्हींपैकी आपल्या गरजेनुसार पर्याय निवडण्याचा अधिकार मिळावा, अशी त्यांची भूमिका आहे.

प्रमुख मागण्या काय?

या अभियानाने काही स्पष्ट मागण्या मांडल्या आहेत. प्रत्येक पेट्रोल पंपावर E20 सोबत 100 टक्के शुद्ध पेट्रोल उपलब्ध करावे. वाहन उत्पादकांनी ज्या इंधनाची शिफारस केली आहे, तेच इंधन ग्राहकांना मिळावे. सामान्य नागरिकांच्या वाहनांवर कोणतेही इंधनविषयक प्रयोग सक्तीने करू नयेत आणि इंधन निवडण्याचा अंतिम अधिकार ग्राहकांचाच असावा, अशी त्यांची भूमिका आहे.

सोशल मीडियावर वाढता प्रतिसाद

E20 जनता पार्टीच्या नावाने स्वतंत्र सोशल मीडिया अकाउंट सुरू करण्यात आले असून, त्यावर E20 पेट्रोलसंदर्भात नियमित पोस्ट केल्या जात आहेत. "आमची वाहने प्रयोगशाळा नाहीत" आणि "ग्राहकांना निवडीचे स्वातंत्र्य मिळाले पाहिजे" अशा संदेशांमुळे या अभियानाची लोकप्रियता वाढत आहे. अल्पावधीतच हजारो नागरिक या मोहिमेशी जोडले गेले असून, फॉलोअर्सची संख्याही वेगाने वाढत आहे.

राजकीय पक्षाशी संबंध नसल्याचा दावा

या अभियानाने स्पष्ट केले आहे की, त्यांचा कोणत्याही राजकीय पक्षाशी किंवा राजकीय विचारसरणीशी संबंध नाही. ग्राहकांचे हक्क जपणे, धोरणांमध्ये पारदर्शकता आणणे आणि E20 धोरणावर खुली चर्चा व्हावी, हा या मोहिमेचा उद्देश असल्याचे त्यांनी म्हटले आहे.

कॉकरोच जनता पार्टीशी तुलना

सोशल मीडियावर E20 जनता पार्टीची तुलना यापूर्वी चर्चेत आलेल्या कॉकरोच जनता पार्टी (CJP) या डिजिटल अभियानाशी केली जात आहे. दोन्ही मोहिमा सोशल मीडियाच्या माध्यमातून मीम्स आणि व्यंगचित्रांच्या सहाय्याने लोकांपर्यंत पोहोचल्या. त्यामुळे E20 जनता पार्टीही मोठ्या नागरिक चळवळीचे रूप घेऊ शकते, अशी चर्चा सुरू आहे.

नागरिकांचा वाढता सहभाग

'X' आणि इन्स्टाग्रामवर या अभियानाला मोठ्या प्रमाणात प्रतिसाद मिळत आहे. वाहनधारक आणि सर्वसामान्य नागरिक या मोहिमेशी जोडले जात असून, E20 पेट्रोल, इंजिनची कार्यक्षमता आणि ग्राहकांच्या निवडीच्या अधिकाराबाबत देशभरात नव्याने चर्चा सुरू झाली आहे.