हिंजवडी-मान-मारुंजीतील रस्ते विकासाला गती! 1 डिसेंबरपासून कामांना सुरुवात, 6 प्रमुख रस्त्यांवर भर

पुणे : हिंजवडी, मान आणि मारुंजी परिसरातील वाढती वाहतूक कोंडी, अपुरे रस्ते, भूसंपादन आणि पायाभूत सुविधांच्या प्रश्नांवर तोडगा काढण्यासाठी जिल्हाधिकारी जितेंद्र डुडी यांच्या अध्यक्षतेखाली उच्चस्तरीय आढावा बैठक घेण्यात आली. या बैठकीत रस्ते विकासाशी संबंधित प्रक्रिया वेगाने पूर्ण करून 1 डिसेंबरपासून प्रत्यक्ष कामांना सुरुवात करण्याचे निर्देश देण्यात आले.

जिल्हाधिकारी कार्यालयात झालेल्या या बैठकीला आमदार शंकर मांडेकर, पुणे महानगर प्रदेश विकास प्राधिकरणाचे महानगर आयुक्त डॉ. अभिजित चौधरी, निवासी उपजिल्हाधिकारी ज्योती कदम यांच्यासह विविध विभागांचे अधिकारी आणि स्थानिक नागरिक उपस्थित होते.

सहा प्रमुख रस्त्यांचा होणार विकास

हिंजवडी आयटी परिसरातील वाहतूक व्यवस्था सुधारण्यासाठी सहा प्रमुख रस्ते निश्चित करण्यात आले आहेत. या रस्त्यांसाठी भूसंपादन, रस्त्यांची आखणी आणि निविदा प्रक्रियेसाठी सल्लागार नियुक्तीची प्रक्रिया अंतिम टप्प्यात असल्याची माहिती बैठकीत देण्यात आली.

रस्त्यांसाठी जमीन देणाऱ्या शेतकरी आणि जमीनमालकांना योग्य मोबदला व उपलब्ध लाभांची माहिती प्रशासनाकडून दिली जाणार आहे. सुमारे 60 ते 70 टक्के जमिनीची संमती आणि आगाऊ ताबा मिळाल्यानंतर निविदा प्रक्रिया तातडीने सुरू करण्याचे नियोजन आहे.

भूसंपादनाची ही प्रक्रिया 15 ऑक्टोबरपर्यंत पूर्ण करण्याचे, तर प्रत्यक्ष रस्ते कामांना 1 डिसेंबरपासून सुरुवात करण्याचे उद्दिष्ट ठेवण्यात आले आहे.

शेतकरी आणि जमीनमालकांसाठी मार्गदर्शन शिबिरे

मान, मारुंजी आणि हिंजवडी परिसरातील शेतकरी व जमीनमालकांसाठी गावनिहाय मार्गदर्शन शिबिरे आयोजित केली जाणार आहेत. या शिबिरांमध्ये भूसंपादन प्रक्रिया, हस्तांतरणीय विकास हक्क (TDR), निवासी वापराचे नियम आणि जमीन देणाऱ्यांना मिळणाऱ्या लाभांची माहिती दिली जाणार आहे.

प्रशासनाच्या अधिकाऱ्यांनी नागरिकांशी थेट संवाद साधून त्यांच्या शंका आणि अडचणी दूर कराव्यात, असेही निर्देश देण्यात आले.

आणखी दोन पर्यायी रस्त्यांची पाहणी

सहा प्रमुख रस्त्यांव्यतिरिक्त स्थानिक नागरिक आणि लोकप्रतिनिधींच्या मागणीनुसार आणखी दोन पर्यायी मार्गांची शक्यता तपासली जाणार आहे.

विप्रो चौक, पुनवळे-मारुंजी जोडरस्ता आणि कालव्यालगतच्या मार्गांची प्रत्यक्ष पाहणी करून पुढील निर्णय घेतला जाणार आहे. सिंचन विभागाच्या ताब्यातील किंवा कालव्यालगतच्या जमिनींचा रस्त्यांसाठी वापर करण्याबाबतचा प्रस्ताव 30 सप्टेंबरपर्यंत तयार करण्याचे नियोजन आहे.

हिंजवडीतील सांडपाणी आणि नदी प्रदूषणावरही लक्ष

बैठकीत हिंजवडी परिसरातील सांडपाणी व्यवस्थापन आणि नदी प्रदूषणाच्या प्रश्नावरही चर्चा झाली. बांधकाम व्यावसायिक आणि आयटी कंपन्यांनी सांडपाण्यावर योग्य प्रक्रिया करून ते थेट नदीपात्रात जाणार नाही, याची काळजी घ्यावी, असे निर्देश देण्यात आले.

PMRDAमार्फत काही प्रमुख गावांमध्ये सांडपाणी प्रक्रिया केंद्रे उभारण्यासाठी निविदा प्रक्रिया सुरू असल्याची माहितीही देण्यात आली. प्रदूषण नियंत्रण नियमांचे उल्लंघन करणाऱ्या औद्योगिक आणि निवासी प्रकल्पांवर संबंधित यंत्रणांकडून कारवाई करण्यात येणार आहे.

वाहतूक कोंडी कमी करण्यासाठी उपाययोजना

भूमकर चौक, रावेत आणि इतर प्रमुख चौकांमधील वाहतूक कोंडी कमी करण्यासाठी रस्ते रुंदीकरण, खड्डे बुजवणे आणि वाहतुकीतील अडथळे दूर करण्यावर भर देण्यात आला आहे.

वाहतूक पोलिसांच्या समन्वयातून हलक्या वाहनांसाठी पर्यायी रस्ते खुले करणे आणि आवश्यक ठिकाणी डांबरीकरणाची कामे तातडीने हाती घेण्याचे नियोजन करण्यात आले आहे.

पाणीपुरवठा आणि इतर पायाभूत सुविधांवर चर्चा

पिंपरी-चिंचवड महानगरपालिका आणि पुणे महानगर प्रदेश विकास प्राधिकरण (PMRDA) यांच्यातील पाणीपुरवठा तसेच रस्ते रुंदीकरणासाठी लागणाऱ्या जमिनीच्या मोबदल्यासंबंधी प्रलंबित प्रश्नांवरही बैठकीत चर्चा करण्यात आली.

संबंधित विभागांनी समन्वय साधून प्रश्न निकाली काढावेत आणि हिंजवडी-मान-मारुंजी परिसरातील रस्ते, वाहतूक आणि इतर पायाभूत सुविधांची कामे निर्धारित वेळेत पूर्ण करावीत, असे निर्देश देण्यात आले.