केतन अग्रवाल हत्या प्रकरणात नवा खुलासा! प्रत्यक्षदर्शींना लोहगडावरून फेकून देण्याची धमकी दिल्याचा आरोप; वडिलांनी व्यक्त केली मोठ्या कटाची शंका

प्रत्यक्षदर्शींना जीवे मारण्याची धमकी दिल्याचा आरोप; केतन अग्रवालच्या वडिलांची सखोल चौकशीची मागणी

पुणे : केतन अग्रवाल हत्या प्रकरणात आणखी काही गंभीर आरोप समोर आले आहेत. केतनला लोहगडावरून ढकलून दिल्याच्या घटनेचे काही प्रत्यक्षदर्शी असल्याचा आणि त्यांना आरोपी चेतन चौधरीने जीवे मारण्याची धमकी दिल्याचा दावा केतनचे वडील विशाल अग्रवाल यांनी केला आहे. आरोपपत्रातही यासंदर्भातील माहिती असल्याचे सांगत त्यांनी सिया गोयलच्या कुटुंबीयांच्या भूमिकेची चौकशी करण्याची मागणी केली आहे.

प्रत्यक्षदर्शींना लोहगडावरून फेकून देण्याची धमकी?

विशाल अग्रवाल यांच्या म्हणण्यानुसार, सिया गोयल आणि तिचा प्रियकर चेतन चौधरी यांनी केतनला लोहगडावरून ढकलून दिल्याचे काही प्रत्यक्षदर्शींनी पाहिले होते. या साक्षीदारांना चेतनने जीवे मारण्याची तसेच लोहगडावरून फेकून देण्याची धमकी दिल्याचा उल्लेख आरोपपत्रात असल्याचे त्यांनी सांगितले.

घटनेच्या महिला प्रत्यक्षदर्शीलाही कोणासमोर काही सांगितल्यास ठार मारण्याची धमकी दिल्याचा दावा अग्रवाल यांनी केला. साक्षीदारांनी न्यायालयात साक्ष देऊ नये यासाठी त्यांच्यावर दबाव आणला जात असल्याचा आरोपही त्यांनी केला.

सिया गोयलच्या कुटुंबीयांवर विशाल अग्रवाल यांचा संशय

या प्रकरणात सिया गोयलच्या कुटुंबीयांचाही सहभाग असण्याची शक्यता विशाल अग्रवाल यांनी व्यक्त केली आहे. सियाचे आई-वडील, भाऊ आणि इतर नातेवाईकांच्या भूमिकेबाबत त्यांनी प्रश्न उपस्थित केले आहेत.

नरेंद्र मित्तल, रेणू मित्तल, प्रवीण गोयल, पूजा गोयल आणि साहिल गोयल यांच्या भूमिकेची चौकशी करण्याची मागणीही त्यांनी केली. सियाच्या चॅटिंगमधून कुटुंबीयांच्या सहभागाचे संकेत मिळत असल्याचा त्यांचा दावा आहे. मात्र, संबंधित कुटुंबीयांचा कटातील सहभाग स्वतंत्रपणे सिद्ध झालेला नाही.

'मुलगा असणं ही काही चूक आहे का?'

मुलाच्या मृत्यूनंतर न्याय मिळवण्यासाठी करावा लागत असलेला संघर्ष सांगताना विशाल अग्रवाल भावुक झाले. एखाद्या मुलीची हत्या झाली असती, तर विविध सामाजिक संघटना न्यायासाठी पुढे आल्या असत्या; मात्र केतनच्या प्रकरणात अपेक्षित पाठिंबा मिळत नसल्याची खंत त्यांनी व्यक्त केली.

मुलगा आणि मुलगी असा भेद न करता प्रत्येक पीडिताला समान न्याय मिळायला हवा, अशी अपेक्षा त्यांनी व्यक्त केली. सामाजिक संघटना आणि नागरिकांनी केतनला न्याय मिळवून देण्यासाठी पुढे यावे, असे आवाहनही त्यांनी केले.

फास्ट ट्रॅक कोर्टात सुनावणीची मागणी

या प्रकरणाचा तपास करून महत्त्वाचे पुरावे गोळा केल्याबद्दल विशाल अग्रवाल यांनी पोलिसांचे कौतुक केले. मात्र, कटात सहभागी असल्याचा संशय असलेल्या इतर व्यक्तींच्या भूमिकेचाही तपास व्हायला हवा, अशी मागणी त्यांनी केली.

साक्षीदारांवर दबाव आणला जात असल्याच्या आरोपांची गंभीर दखल घेऊन त्यांचे संरक्षण करावे, सर्व साक्षीदारांचे जबाब नोंदवावेत आणि प्रकरणाची फास्ट ट्रॅक कोर्टात सुनावणी घ्यावी, अशी विनंती त्यांनी सरकार, मुख्यमंत्री आणि न्यायव्यवस्थेकडे केली आहे.

सर्व दोषींना फाशीची शिक्षा व्हावी, अशी मागणीही विशाल अग्रवाल यांनी केली असून, मुलाला न्याय मिळेपर्यंत आपला लढा सुरूच राहील, असा निर्धार त्यांनी व्यक्त केला आहे.

तपासातील महत्त्वाची माहिती : पुणे ग्रामीण पोलिसांनी १९ सप्टेंबर २०२६ रोजी वडगाव मावळ न्यायालयात ५,०५३ पानांचे आरोपपत्र दाखल केले आहे. त्यात सिया गोयल, चेतन चौधरी आणि रितेश हांगे यांना आरोपी करण्यात आले आहे. आरोपपत्रात प्रत्यक्षदर्शींचे जबाब, डिजिटल पुरावे आणि कॉल रेकॉर्डचा समावेश आहे.