लग्न ठरलंय? मग जेवणावळीचा हिशोबही द्यावा लागणार! FDA चा मोठा निर्णय
लग्नसमारंभात अन्नातून होणाऱ्या विषबाधेच्या घटना रोखण्यासाठी महाराष्ट्राच्या अन्न व औषध प्रशासनाने (FDA) महत्त्वाचा निर्णय घेतल्याची माहिती समोर आली आहे. यानुसार लग्नसमारंभात जेवणाची व्यवस्था करणाऱ्यांना पाहुण्यांची संख्या, तयार होणारे खाद्यपदार्थ आणि केटरर्सची माहिती FDA विभागाला द्यावी लागणार आहे. FDA आयुक्त तुकाराम मुंढे यांच्या नेतृत्वाखाली अन्नसुरक्षेच्या दृष्टीने हा निर्णय घेण्यात आल्याचे वृत्त आहे.
मुंबई : राज्यात अन्न व औषध प्रशासन विभागाकडून (FDA) अन्न आणि औषधांच्या गुणवत्तेबाबत कठोर पावले उचलली जात आहेत. FDA आयुक्त तुकाराम मुंढे यांनी विभागाची सूत्रे हाती घेतल्यानंतर विविध ठिकाणी तपासणी आणि कारवाईचा धडाका सुरू आहे. अशातच आता लग्नसमारंभातील जेवणावळींबाबत महत्त्वाचा निर्णय घेतल्याची माहिती समोर आली आहे. या निर्णयामुळे लग्नसमारंभात जेवणाची व्यवस्था करणाऱ्यांना FDA विभागाला काही महत्त्वाची माहिती द्यावी लागणार आहे.
लग्नाच्या जेवणावळीची माहिती FDA ला द्यावी लागणार?
नव्या निर्णयानुसार, घरात लग्नसमारंभ किंवा अन्य मोठा कार्यक्रम आयोजित करून पाहुण्यांसाठी जेवणाची व्यवस्था केली जाणार असेल, तर त्यासंदर्भातील माहिती FDA विभागाला आधीच द्यावी लागणार असल्याचे वृत्त आहे. यामध्ये जेवणासाठी येणाऱ्या पाहुण्यांची एकूण संख्या, तयार करण्यात येणारे खाद्यपदार्थ आणि जेवणाची जबाबदारी असलेल्या केटरर्सची माहिती देणे अपेक्षित आहे.
अन्नातून विषबाधा रोखण्यासाठी निर्णय
लग्नसमारंभ आणि मोठ्या कार्यक्रमांमध्ये अनेकदा शेकडो ते हजारो लोकांसाठी जेवण तयार केले जाते. अशा वेळी अन्नाची योग्य साठवणूक, स्वच्छता आणि अन्न तयार करण्याच्या प्रक्रियेत निष्काळजीपणा झाल्यास विषबाधेच्या घटना घडू शकतात. अशा घटना रोखणे आणि नागरिकांना सुरक्षित अन्न मिळावे, हा या निर्णयामागील मुख्य उद्देश असल्याचे सांगितले जात आहे.
FDA कडून ऑक्टोबरमध्ये मोठी कारवाई
दरम्यान, FDA विभागाने ऑक्टोबर 2026 मध्ये राज्यभरात मोठ्या प्रमाणावर तपासणी आणि कारवाई केली आहे. विभागाने एका महिन्यात तब्बल 1,986 तपासण्या केल्या असून 544 नियामक कारवाया सुरू केल्या आहेत.
औषध उत्पादन करणाऱ्या युनिट्समध्ये 292 तपासण्या करण्यात आल्या. यामध्ये 17 उत्पादन परवाने रद्द करण्यात आले, तर 55 परवाने निलंबित करण्यात आले. किरकोळ आणि घाऊक औषध विक्री करणाऱ्या आस्थापनांच्या 1,694 तपासण्या करण्यात आल्या. यामध्ये 105 परवाने रद्द आणि 367 परवाने निलंबित करण्यात आले.
34.51 लाखांची अवैध औषधे जप्त
इतकेच नव्हे, तर 11 शोध आणि जप्ती मोहिमांमध्ये सुमारे 34.51 लाख रुपयांची अवैध औषधे आणि सौंदर्यप्रसाधने जप्त करण्यात आली. एप्रिल ते ऑक्टोबर 2026 या सात महिन्यांच्या कालावधीत राज्यभरात 7,950 तपासण्या करण्यात आल्या. या कारवाईत 555 परवाने रद्द, तर 2,074 परवाने निलंबित करण्यात आले.
सुरक्षित अन्न आणि औषधांसाठी FDA चा पुढाकार
ऑक्टोबर महिन्यात कोकण विभागात सर्वाधिक 556 तपासण्या करण्यात आल्या. त्यानंतर पुणे आणि बृहन्मुंबई विभागांचा क्रमांक लागतो. FDA आयुक्त तुकाराम मुंढे यांनी 'सुरक्षित अन्न, सुरक्षित औषधे, सुरक्षित महाराष्ट्र' हे ब्रीदवाक्य अधोरेखित केले आहे. आता लग्नसमारंभातील जेवणावळींबाबतच्या नव्या निर्णयामुळे अन्नसुरक्षेच्या नियमांची अंमलबजावणी आणखी कठोर होण्याची शक्यता आहे.