मुंबई विद्यापीठाचा मोठा निर्णय! परीक्षा सुरू होण्याच्या 30 मिनिटे आधी हॉलमध्ये हजर राहावं लागणार

मुंबई : मुंबई विद्यापीठातील विद्यार्थ्यांसाठी अत्यंत महत्त्वाची बातमी समोर आली आहे. आता परीक्षा सुरू होण्याच्या वेळेवर परीक्षा केंद्रावर पोहोचून चालणार नाही! शैक्षणिक वर्ष 2026-27 पासून विद्यार्थ्यांना परीक्षेच्या निर्धारित वेळेच्या तब्बल 30 मिनिटे आधी परीक्षा कक्षात उपस्थित राहणे बंधनकारक करण्यात आले आहे.

मुंबई विद्यापीठ आणि विद्यापीठाशी संलग्न सर्व महाविद्यालयांमध्ये हा नियम लागू केला जाणार आहे. परीक्षा व मूल्यमापन मंडळ, व्यवस्थापन परिषद आणि विद्वत परिषदेच्या बैठकीत या निर्णयाला मंजुरी देण्यात आली आहे.

नेमका नियम काय?

नव्या नियमानुसार विद्यार्थ्यांनी परीक्षेच्या वेळेच्या किमान 30 मिनिटे आधी परीक्षा कक्षात आपल्या जागेवर उपस्थित असणे आवश्यक आहे.

उदाहरणार्थ, एखाद्या परीक्षेची वेळ सकाळी 10.30 वाजता असेल, तर विद्यार्थ्यांनी सकाळी 10 वाजेपर्यंत परीक्षा कक्षात उपस्थित राहणे अपेक्षित आहे.

निर्धारित वेळेनंतर परीक्षा केंद्रावर पोहोचणाऱ्या विद्यार्थ्यांना प्रवेश मिळण्यात अडचणी येऊ शकतात. त्यामुळे विद्यार्थ्यांनी शेवटच्या क्षणी परीक्षा केंद्रावर पोहोचणे टाळावे, असे विद्यापीठाकडून स्पष्ट करण्यात आले आहे.

विद्यार्थ्यांना 30 मिनिटे आधी का बोलावले?

परीक्षा सुरू होण्यापूर्वी विद्यार्थ्यांचे हॉल तिकीट आणि ओळखपत्र तपासणे, आसनव्यवस्था निश्चित करणे तसेच बायोमेट्रिक किंवा इतर आवश्यक पडताळणी प्रक्रिया पूर्ण करण्यासाठी वेळ लागतो.

याशिवाय, परीक्षांमध्ये होणाऱ्या पेपरफुटीच्या घटनांना आळा घालण्यासाठी आणि परीक्षा प्रक्रियेत अधिक पारदर्शकता आणण्यासाठी हा निर्णय महत्त्वाचा मानला जात आहे.

सर्व महाविद्यालयांना निर्देश

परीक्षा व मूल्यमापन मंडळाच्या संचालिका डॉ. पूजा रौंदळे यांनी यासंदर्भात अधिकृत पत्रक जारी केले आहे. विद्यापीठाचे सर्व शैक्षणिक विभाग, संलग्न व स्वायत्त महाविद्यालयांचे प्राचार्य, उपपरिसरांचे समन्वयक आणि संस्थाचालकांनी हा नियम विद्यार्थी, शिक्षक आणि परीक्षा कर्मचाऱ्यांच्या निदर्शनास आणून द्यावा, असे निर्देश देण्यात आले आहेत.

परीक्षा सुरळीत, शांततेत आणि शिस्तबद्ध पद्धतीने पार पडण्यासाठी विद्यार्थ्यांनी सर्व नियमांचे पालन करून परीक्षा कर्मचाऱ्यांना सहकार्य करावे, असे आवाहनही विद्यापीठ प्रशासनाने केले आहे.

थोडक्यात, 2026-27 पासून मुंबई विद्यापीठाच्या परीक्षेला उशिरा पोहोचण्याची सवय विद्यार्थ्यांना चांगलीच महागात पडू शकते. त्यामुळे परीक्षा सुरू होण्याच्या वेळेऐवजी आता किमान 30 मिनिटे आधी परीक्षा कक्षात पोहोचणे आवश्यक ठरणार आहे.