मोहोळ यांच्या ताफ्यात अचानक घुसली कार; सुरक्षा कर्मचाऱ्यांच्या सतर्कतेने टळला अनर्थ?

पुणे : केंद्रीय राज्यमंत्री मुरलीधर मोहोळ यांच्या सुरक्षेशी संबंधित पुण्यातील एका घटनेने खळबळ उडाली आहे. विमानतळावरून आपल्या निवासस्थानाकडे निघालेल्या मोहोळ यांच्या कॉन्व्हॉयमध्ये अचानक एक भरधाव कार घुसली. एवढेच नव्हे, तर चालकाने मंत्र्यांच्या वाहनाला धोकादायकरीत्या कट मारून पुढे जाण्याचाही प्रयत्न केल्याचा आरोप आहे.

सुरक्षा कर्मचाऱ्यांनी संबंधित चालकाला वारंवार गाडी थांबवण्याचे संकेत दिले. मात्र, तो कॉन्व्हॉयमधील वाहनांच्या मधून मार्ग काढण्याचा प्रयत्न करत राहिला. अखेर सुरक्षा पथकाने कार थांबवत चालकाला ताब्यात घेतले. त्यानंतर समोर आलेल्या माहितीमुळे पोलिसांनी या घटनेकडे अधिक गांभीर्याने पाहण्यास सुरुवात केली.

संचेती चौकात नेमकं काय घडलं?

पोलिसांनी दिलेल्या माहितीनुसार, ही घटना 13 सप्टेंबर रोजी रात्री साडेआठच्या सुमारास शिवाजीनगरमधील संचेती चौक परिसरात घडली.

केंद्रीय राज्यमंत्री मुरलीधर मोहोळ पुणे विमानतळावरून शिवाजीनगरमार्गे कोथरूडमधील आपल्या निवासस्थानाकडे कॉन्व्हॉयसह निघाले होते. याचदरम्यान शुभम विजय वनीत (वय 32, रा. नाना पेठ) याने आपली कार भरधाव आणि बेदरकारपणे चालवत कॉन्व्हॉयमध्ये प्रवेश केल्याचा आरोप पोलिसांनी केला आहे.

मंत्र्यांच्या गाडीला कट मारण्याचा प्रयत्न

पोलिसांच्या म्हणण्यानुसार, संबंधित चालकाने कॉन्व्हॉयमधून पुढे जाण्याच्या प्रयत्नात मुरलीधर मोहोळ यांच्या वाहनाला धोकादायकरीत्या कट मारण्याचा प्रयत्न केला.

कॉन्व्हॉयमधील सुरक्षा कर्मचाऱ्यांनी कारचालकाला थांबण्याचा वारंवार इशारा दिला. मात्र, त्याकडे दुर्लक्ष करून तो पुढे जाण्याचा प्रयत्न करत राहिल्याचे तक्रारीत नमूद करण्यात आले आहे.

यानंतर सुरक्षा कर्मचारी आणि पोलिसांनी तत्काळ कार थांबवून चालकाला ताब्यात घेतले.

चालकाची तपासणी केली अन् धक्कादायक माहिती समोर

या प्रकरणात मंत्र्यांच्या सुरक्षा पथकातील सहायक पोलीस फौजदार ईश्वर लक्ष्मण भिकुले (वय 50) यांनी शिवाजीनगर पोलीस ठाण्यात तक्रार दिली आहे.

पोलिसांनी शुभम वनीत याला ताब्यात घेऊन वैद्यकीय तपासणी केली. त्यामध्ये त्याने मद्यप्राशन केल्याचे निष्पन्न झाल्याचे पोलिसांनी सांगितले आहे.

केंद्रीय राज्यमंत्र्यांच्या कॉन्व्हॉयमध्ये भरधाव कार घुसल्यामुळे सुरक्षेच्या दृष्टीनेही या घटनेकडे गांभीर्याने पाहिले जात आहे.

कोणत्या कलमांखाली गुन्हा?

शिवाजीनगर पोलिसांनी संबंधित चालकाविरुद्ध भारतीय न्याय संहितेच्या कलम 281 तसेच मोटार वाहन कायद्याच्या कलम 184, 185 आणि 119/177 अंतर्गत गुन्हा दाखल केला आहे.

कायदेशीर प्रक्रियेनुसार चालकाला नोटीस बजावण्यात आली आहे. पोलीस उपनिरीक्षक विकास काटे या प्रकरणाचा पुढील तपास करत आहेत.

केंद्रीय मंत्र्यांच्या कॉन्व्हॉयमध्ये एखादे वाहन अशा प्रकारे घुसल्याने सुरक्षेच्या व्यवस्थेबाबतही चर्चा सुरू झाली असून, संबंधित चालकाचा नेमका हेतू काय होता आणि ही घटना केवळ बेदरकार वाहनचालवण्यामुळे घडली का, याचा तपास पोलीस करत आहेत.