रस्त्यांवर फटाके बंद, आवाजावर पोलिसांची नजर! हायकोर्टाच्या आदेशानंतर पुणेकर मंचाने सत्ताधाऱ्यांना काय सुनावलं?

पुणे : सण-उत्सवांदरम्यान होणाऱ्या ध्वनीप्रदूषणाच्या मुद्द्यावर मुंबई उच्च न्यायालयाने घेतलेल्या भूमिकेचे लाऊडस्पीकरविरोधी पुणेकर मंचाने स्वागत केले आहे. धार्मिक मिरवणुकांमधील डीजे, लाऊडस्पीकर आणि फटाक्यांमुळे होणाऱ्या प्रदूषणाची न्यायालयाने स्वतःहून दखल घेतली होती. न्यायमूर्ती गिरीश कुलकर्णी आणि न्यायमूर्ती डॉ. नीला गोखले यांच्या खंडपीठासमोर या प्रकरणाची सुनावणी झाली.

हायकोर्टाच्या आदेशात नेमकं काय?

मंचाने प्रसिद्ध केलेल्या निवेदनानुसार, न्यायालयाने सार्वजनिक रस्त्यांवर फटाके फोडण्यास बंदी घालण्याचे निर्देश दिले आहेत. तसेच मिरवणुकांसाठी मिळालेली परवानगी प्रदर्शित करणे अनिवार्य करण्यात आले आहे. मिरवणुकांदरम्यान पोलिसांनी आणि संबंधित अधिकाऱ्यांनी आवाजाची डेसिबल पातळी मोजावी आणि निर्धारित मर्यादांचे उल्लंघन झाल्यास कायद्यानुसार कारवाई करावी, असे निर्देश देण्यात आल्याचे मंचाने म्हटले आहे. ढोल पथकांकडून संगीत वाद्य म्हणून वापरल्या जाणाऱ्या सिलिंडरवरही बंदी घालण्यात आल्याचे निवेदनात नमूद आहे.

प्रशासन आणि सत्ताधाऱ्यांवर मंचाची टीका

न्यायालयाच्या निर्देशांचे स्वागत करताना मंचाने प्रशासन आणि सत्ताधाऱ्यांच्या भूमिकेवर टीका केली आहे. ध्वनीप्रदूषणाविरोधात पुणेकरांना रस्त्यावर उतरावे लागले. मात्र, न्यायालयाच्या हस्तक्षेपामुळे या लढ्याला बळ मिळाल्याचे मंचाचे म्हणणे आहे.

मुख्यमंत्री आणि इतर लोकप्रतिनिधींनी यापूर्वी घेतलेल्या भूमिकेवरही मंचाने नाराजी व्यक्त केली आहे. न्यायालयाचा निर्णय हा संबंधित प्रशासन आणि सत्ताधाऱ्यांना चपराक असल्याची प्रतिक्रिया मंचाने दिली आहे.

आता पुणे पोलिसांसमोर नवे आव्हान!

आवाजाची मोजणी करूनही नियमांचे प्रभावी पालन होत नसल्याचा मुद्दा मंचाने उपस्थित केला आहे. महाराष्ट्र प्रदूषण नियंत्रण मंडळाकडून अनेक ठिकाणी कंत्राटदारांमार्फत आवाजाची मोजणी केली जाते. मात्र, त्यातून अपेक्षित परिणाम साधला जात नसल्याचे मंचाचे म्हणणे आहे.

आता पोलीस आयुक्त, प्रदूषण नियंत्रण मंडळ आणि पुणे महापालिका आयुक्त यांनी समन्वयाने काम करून ध्वनीप्रदूषणाच्या नियमांची प्रभावी अंमलबजावणी करावी, अशी मागणी मंचाने केली आहे.

सण गोंगाटात नव्हे, उत्साहात साजरे करा!

गणेश मंडळांनी यापूर्वीही सकारात्मक बदल स्वीकारले आहेत. आताही मंडळे नागरिकांच्या भावनांचा विचार करून उत्सव आनंदात आणि उत्साहात साजरे करतील, अशी अपेक्षा मंचाने व्यक्त केली आहे.

ध्वनीप्रदूषणाविरोधात आंदोलन करणाऱ्या पुणेकरांच्या लढ्यातील हा पहिला महत्त्वाचा टप्पा असल्याचे मंचाने म्हटले आहे. मात्र, न्यायालयाच्या निर्देशांची प्रत्यक्षात किती प्रभावी अंमलबजावणी होते, याकडे आता पुणेकरांचे लक्ष असणार आहे.