पुणे पोलीस आयुक्तांचा मोठा निर्णय; पीआय मानसिंग पाटील यांची विशेष शाखेत बदली

पुणे : पुणे शहर पोलीस आयुक्त अमितेश कुमार यांनी पोलीस निरीक्षकांच्या पदस्थापनांचे (बदल्यांचे) आदेश जारी केले आहेत. पोलीस आस्थापना मंडळाच्या बैठकीत घेण्यात आलेल्या निर्णयानुसार काही पोलीस निरीक्षकांच्या बदल्या प्रशासकीय कारणास्तव करण्यात आल्याचे आदेशात स्पष्ट करण्यात आले आहे. संबंधित अधिकाऱ्यांना नव्या पदस्थापनेच्या ठिकाणी तातडीने रुजू होऊन अनुपालन अहवाल सादर करण्याचे निर्देश देण्यात आले आहेत.

या आदेशानुसार, पोलीस निरीक्षक मानसिंग संभाजी पाटील यांची चतु:शृंगी (भारती विद्यापीठ) पोलीस ठाण्यातून विशेष शाखा, पुणे शहर येथे बदली करण्यात आली आहे. या बदल्यांची तात्काळ अंमलबजावणी करण्याचे आदेश पोलीस आयुक्तालयाने दिले असून, प्रशासकीय कामकाज अधिक प्रभावी करण्याच्या दृष्टीने हा निर्णय घेण्यात आल्याचे आदेशात नमूद आहे.

मात्र, या बदलीनंतर पोलीस वर्तुळात विविध चर्चांना उधाण आले आहे. काही दिवसांपूर्वी चतु:शृंगी पोलीस ठाण्याच्या हद्दीत घडलेल्या एका वादग्रस्त घटनेत अल्पवयीन आरोपींना गाडीच्या बोनेटला बांधून त्यांची धिंड काढल्याचा तसेच त्यांना गुडघ्यावर चालविण्यात आल्याचा प्रकार समोर आला होता. या घटनेचे व्हिडीओ सोशल मीडियावर व्हायरल झाल्यानंतर राज्यभरातून तीव्र प्रतिक्रिया उमटल्या होत्या. नागरिक, सामाजिक संघटना आणि कायदेतज्ज्ञांनी या कारवाईवर प्रश्नचिन्ह उपस्थित करत अल्पवयीन आरोपींशी अशा प्रकारची वागणूक कायद्याच्या चौकटीत बसत नसल्याचे मत व्यक्त केले होते.

या घटनेची गंभीर दखल घेत मानवाधिकार आयोगाने संबंधित अधिकाऱ्यांकडून सविस्तर अहवाल मागवला होता. आयोगाच्या सदस्यांनीही या प्रकरणाची माहिती घेत चौकशी प्रक्रिया सुरू केली होती. त्यामुळे या घटनेनंतर अवघ्या काही दिवसांतच संबंधित पोलीस निरीक्षकांची बदली झाल्याने या दोन्ही घटनांचा संबंध जोडला जात आहे. पोलीस विभागातही याबाबत विविध तर्कवितर्क व्यक्त केले जात असून, या बदलीमागे मानवाधिकार आयोगाच्या हस्तक्षेपाचा प्रभाव असल्याची चर्चा रंगली आहे.

तथापि, अधिकृत बदली आदेशात या बदल्यांचे कारण केवळ "प्रशासकीय कारणास्तव" असे नमूद करण्यात आले आहे. वादग्रस्त घटनेचा आणि या बदलीचा कोणताही संबंध असल्याचे पुणे पोलीस प्रशासनाने अधिकृतपणे स्पष्ट केलेले नाही. त्यामुळे या बदलीमागील नेमके कारण अद्याप अस्पष्ट असून, अधिकृत स्पष्टीकरण येईपर्यंत चर्चांना पूर्णविराम मिळण्याची शक्यता कमी आहे.

दरम्यान, या प्रकरणातील मानवाधिकार आयोगाची चौकशी, त्याचा अहवाल आणि त्यानंतर होणारी पुढील कार्यवाही याकडे पोलीस विभागासह सर्वसामान्य नागरिकांचे लक्ष लागले आहे. तसेच, या बदलीबाबत प्रशासनाकडून पुढे कोणते स्पष्टीकरण दिले जाते, याकडेही सर्वांचे लक्ष लागले आहे.