रत्नागिरीत पूर ओसरताच महाकाय मगर नदीबाहेर; गावकऱ्यांमध्ये भीतीचे वातावरण

रत्नागिरी: रत्नागिरी जिल्ह्यातील खेड शहरातून वाहणाऱ्या नारंगी नदीचा पूर ओसरल्यानंतर एका महाकाय मगरीचा वावर समोर आला आहे. मुसळधार पावसामुळे नदीचे पाणी परिसरातील शेतांमध्ये आणि सखल भागात शिरले होते. आता पाणी ओसरू लागल्याने ही मगर मानवी वस्त्यांच्या आणि शेतीच्या परिसरात दिसू लागल्याने नागरिकांमध्ये भीतीचे वातावरण निर्माण झाले आहे.

मिळालेल्या माहितीनुसार, सुसेरी, चिंचघर, खारी गाव तसेच डेंटल कॉलेज परिसरात मगरीचा वावर वारंवार दिसून आला आहे. पूरग्रस्त भागातील पाणथळ जागा आणि नदीकाठावर मगर मुक्तपणे फिरताना काही स्थानिकांनी मोबाईलमध्ये व्हिडिओ चित्रीत केले आहेत. हे व्हिडिओ सध्या सोशल मीडियावर मोठ्या प्रमाणात व्हायरल होत असून नागरिकांमध्ये चिंतेचे वातावरण आहे.

घटनेची माहिती मिळताच वन विभाग आणि स्थानिक प्रशासनाने तातडीने परिस्थितीची दखल घेतली आहे. नदीकाठच्या गावांतील नागरिकांनी सतर्क राहावे, नदीपात्रात किंवा पाणथळ भागात विनाकारण जाऊ नये, तसेच लहान मुले आणि पाळीव जनावरे नदीकाठापासून दूर ठेवावीत, असे आवाहन करण्यात आले आहे.

वन विभागाचे पथक मगरीच्या हालचालींवर सातत्याने लक्ष ठेवून असून आवश्यकतेनुसार पुढील कारवाई करण्यात येणार असल्याची माहिती देण्यात आली आहे. नागरिकांनी अफवांवर विश्वास न ठेवता कोणत्याही ठिकाणी मगर आढळल्यास तात्काळ वन विभाग किंवा स्थानिक प्रशासनाला माहिती द्यावी, असेही आवाहन करण्यात आले आहे.

पूरानंतर वन्यजीव नदीपात्राबाहेर येण्याच्या घटना अधूनमधून घडत असतात. त्यामुळे नदीकाठच्या परिसरात राहणाऱ्या नागरिकांनी विशेष काळजी घेण्याची गरज असून प्रशासनाच्या सूचनांचे पालन करण्याचे आवाहन करण्यात आले आहे.