सैराट' फेम अरबाज शेखवर दुःखाचा डोंगर; वडील अस्लम शेख यांचे उपचारादरम्यान निधन

सोलापूर : मराठी चित्रपटसृष्टीतील प्रसिद्ध अभिनेता अरबाज शेख यांच्यावर दुःखाचा डोंगर कोसळला आहे. ‘सैराट’ या सुपरहिट चित्रपटातील ‘सल्या’ या भूमिकेमुळे घराघरात पोहोचलेले अरबाज शेख यांचे वडील अस्लम शेख यांचे निधन झाले आहे.

अस्लम शेख यांना काही दिवसांपूर्वी मेंदूमध्ये रक्तस्राव (ब्रेन हॅमरेज) झाल्याने सोलापूरमधील एका खासगी रुग्णालयात दाखल करण्यात आले होते. त्यांच्यावर जवळपास महिनाभर उपचार सुरू होते. डॉक्टरांनी त्यांना वाचवण्यासाठी सर्वतोपरी प्रयत्न केले, मात्र अखेर उपचारांना यश आले नाही.

वडिलांच्या उपचारासाठी मोठा खर्च होत असल्याने अरबाज शेख यांनी सोशल मीडियाच्या माध्यमातून मदतीचे आवाहन केले होते. त्यांनी भावनिक व्हिडिओ शेअर करत वडिलांच्या उपचारासाठी मदतीची विनंती केली होती. त्यांचा हा व्हिडिओ सोशल मीडियावर मोठ्या प्रमाणात व्हायरल झाला होता.

अरबाज यांच्या आवाहनानंतर काही नेते आणि सामाजिक कार्यकर्त्यांनी मदतीचा हात पुढे केला. त्यानंतर अस्लम शेख यांच्यावर पुढील उपचार करण्यात आले. मात्र, प्रकृतीमध्ये अपेक्षित सुधारणा न झाल्याने अखेर त्यांचे निधन झाले.

वडिलांच्या निधनामुळे अरबाज शेख आणि त्यांच्या कुटुंबावर दुःखाचा डोंगर कोसळला आहे. चाहत्यांसह मराठी चित्रपटसृष्टीतील अनेक कलाकारांनी सोशल मीडियावरून श्रद्धांजली व्यक्त करत शेख कुटुंबीयांप्रती संवेदना व्यक्त केल्या आहेत.