धक्कादायक! जन्मदात्यांनीच १.२० लाखांत विकलं पोटचं बाळ; ४८ तासांत तीनदा सौदा, थेट तेलंगणापर्यंत पोहोचलं प्रकरण!
छत्रपती संभाजीनगरमध्ये अवघ्या एक महिन्याच्या बाळाच्या विक्रीचं धक्कादायक प्रकरण उघडकीस आलं आहे. जन्मदात्यांनी १ लाख २० हजार रुपयांत विकलेल्या बाळाचे पुढील ४८ तासांत आणखी व्यवहार झाल्याचं पोलीस तपासात समोर आलं. नांदेडमार्गे तेलंगणापर्यंत पोहोचलेल्या बाळाची पोलिसांनी सुटका केली असून बालकल्याण समितीच्या आदेशानुसार त्याला संस्थेकडे सुपूर्द करण्यात आलं आहे.
जन्मदात्यांनीच केला बाळाचा सौदा; पैशांतून खरेदी केले सोन्याचे दागिने आणि महागडे मोबाईल!
छत्रपती संभाजीनगर : छत्रपती संभाजीनगरमधून एक धक्कादायक बाळविक्री प्रकरण समोर आलं आहे. लिव्ह-इन रिलेशनशिपमधून जन्मलेल्या अवघ्या एक महिन्याच्या बाळाची जन्मदात्यांनीच १ लाख २० हजार रुपयांत विक्री केल्याचं उघड झालं आहे. धक्कादायक म्हणजे, अवघ्या ४८ तासांत या बाळाचे तीन व्यवहार झाले. संभाजीनगरपासून नांदेडमार्गे थेट तेलंगणापर्यंत बाळाला नेण्यात आलं. या संपूर्ण प्रकरणाचा पोलिसांनी पर्दाफाश करत बाळाची सुरक्षित सुटका केली आहे.
१.२० लाखांत बाळाची विक्री; पुढे किंमत पोहोचली ३.७० लाखांवर!
मिळालेल्या माहितीनुसार, लिव्ह-इन रिलेशनशिपमध्ये राहणाऱ्या दाम्पत्याने आपल्या एक महिन्याच्या बाळाचा १ लाख २० हजार रुपयांत सौदा केला. या पैशांतून महागडे मोबाईल आणि सोन्याचे दागिने खरेदी करण्यात आल्याचं पोलीस तपासात समोर आलं आहे.
मात्र, बाळाच्या विक्रीचा प्रकार इथेच थांबला नाही. पहिल्या व्यवहारानंतर दलालांच्या माध्यमातून बाळाची पुन्हा विक्री करण्यात आली. पुढील एका व्यवहारात बाळासाठी तब्बल ३ लाख ७० हजार रुपये मोजण्यात आल्याची माहिती समोर आली आहे.
अवघ्या ४८ तासांत तीन व्यवहार; ५०० किलोमीटरहून अधिक प्रवास!
या प्रकरणात सर्वाधिक धक्कादायक बाब म्हणजे अवघ्या ४८ तासांत बाळाचे तीन व्यवहार झाल्याचं पोलीस तपासात निष्पन्न झालं आहे. छत्रपती संभाजीनगरमधून सुरू झालेला बाळाचा प्रवास नांदेडमार्गे थेट तेलंगणापर्यंत पोहोचला. या काळात बाळाला ५०० किलोमीटरहून अधिक अंतरावर नेण्यात आलं.
जन्मदात्यांकडून सुरू झालेल्या या व्यवहारात दलालांचाही सहभाग असल्याचं समोर आलं आहे. प्रत्येक व्यवहारात बाळाची किंमत बदलत गेली. त्यामुळे या प्रकरणात आणखी किती व्यक्ती सहभागी आहेत, याबाबत प्रश्न उपस्थित झाले आहेत.
पोलिसांकडून बाळाची सुटका; संस्थेकडे सुपूर्द
या संपूर्ण प्रकरणाचा छडा लावत पोलिसांनी बाळाला सुरक्षितपणे परत आणलं आहे. बाळविक्रीच्या व्यवहारात सहभागी असलेल्या संशयितांनाही पोलिसांनी ताब्यात घेतलं आहे.
सुटका करण्यात आलेल्या बाळाला बालकल्याण समितीच्या आदेशानुसार संस्थेकडे सुपूर्द करण्यात आलं आहे. जन्मदात्यांकडूनच बाळाची विक्री झाल्याच्या या घटनेमुळे बालतस्करी आणि बेकायदेशीर बाळविक्रीचा गंभीर प्रश्न पुन्हा एकदा ऐरणीवर आला आहे.