संजय राऊतांच्या आरोपांना तुकाराम मुंढेंचं थेट उत्तर! FDA अधिकाऱ्यांच्या वसुलीवरून वाद; पुरावे देण्याचं आवाहन

संजय राऊतांच्या आरोपांवर तुकाराम मुंढेंचं प्रत्युत्तर

मुंबई : शिवसेना उद्धव बाळासाहेब ठाकरे पक्षाचे खासदार संजय राऊत यांनी अन्न व औषध प्रशासनाचे आयुक्त तुकाराम मुंढे यांना पत्र लिहून FDA अधिकाऱ्यांवर गंभीर आरोप केले आहेत. अन्नभेसळविरोधातील कारवाईचं कौतुक करतानाच काही अधिकारी हॉटेल व्यावसायिकांना धमकावून आणि ब्लॅकमेल करून पैसे उकळत असल्याचा आरोप राऊत यांनी केला आहे. संबंधित अधिकाऱ्यांवर तातडीने कारवाई करण्याची मागणीही त्यांनी केली आहे.

या आरोपांवर तुकाराम मुंढे यांनी प्रतिक्रिया देत भ्रष्टाचाराबाबत ठोस माहिती किंवा पुरावे असल्यास ते आपल्याकडे अथवा लाचलुचपत प्रतिबंधक विभागाकडे (ACB) सादर करण्याचं आवाहन केलं आहे.

अधिकाऱ्यांच्या भ्रष्टाचाराचे पुरावे द्या; मुंढेंचं आवाहन

संजय राऊत यांच्या आरोपांबाबत बोलताना तुकाराम मुंढे यांनी आपल्याकडे अद्याप कोणत्याही अधिकाऱ्याविरोधात पैसे मागितल्याची विशिष्ट तक्रार आलेली नसल्याचं स्पष्ट केलं. कोणत्या अधिकाऱ्याने कोणाकडे पैशांची मागणी केली, यासंदर्भातील तपशील मिळाल्यास संबंधित प्रकरणाची चौकशी करता येईल, असं त्यांनी सांगितलं.

भ्रष्टाचाराबाबत कोणाकडे माहिती असल्यास ती थेट प्रशासनाकडे किंवा ACB कडे द्यावी, असं आवाहन करतानाच तक्रारदारांची ओळख गोपनीय ठेवली जाईल, असं आश्वासनही मुंढे यांनी दिलं.

दोन ट्रकमधून १ कोटी २६ लाखांचा गुटखा जप्त

पत्रकार परिषदेत तुकाराम मुंढे यांनी राज्यातील प्रतिबंधित गुटख्याविरोधात करण्यात आलेल्या कारवाईची माहितीही दिली. महाराष्ट्रात गुटख्याचं उत्पादन होत नसलं, तरी इतर राज्यांमधून त्याची अवैध वाहतूक होत असल्याचं त्यांनी सांगितलं.

मुंढे यांनी दिलेल्या माहितीनुसार, FDA ने दोन ट्रकमधून तब्बल १ कोटी २६ लाख रुपये किमतीचा गुटखा जप्त केला. यापैकी एक ट्रक पालघरमध्ये पकडण्यात आला. पहिल्या ट्रकवरील कारवाईची माहिती मिळाल्यानंतर नाशिकमार्गे ठाण्याकडे येणारा दुसरा ट्रक भिवंडीमध्ये पकडण्यात आला. कंटेनरमध्ये गुटखा लपवून त्याची वाहतूक केली जात असल्याचं मुंढे यांनी सांगितलं.

खामगावमध्ये साडेतीन कोटींचा खाद्यतेलाचा साठा जप्त

दरम्यान, बुलढाणा जिल्ह्यातील खामगावमध्येही FDA ने कारवाई केल्याची माहिती मुंढे यांनी दिली. या कारवाईत तब्बल साडेतीन कोटी रुपये किमतीचा खाद्यतेलाचा साठा जप्त करण्यात आला. संबंधित ठिकाणी विनापरवाना खाद्यतेलाची विक्री सुरू असल्याचं त्यांनी सांगितलं.

एकीकडे अन्नभेसळ आणि प्रतिबंधित गुटख्याविरोधात FDA ची कारवाई सुरू असताना दुसरीकडे विभागातील अधिकाऱ्यांवर संजय राऊत यांनी केलेल्या आरोपांमुळे भ्रष्टाचाराच्या तक्रारींचा मुद्दा चर्चेत आला आहे. या आरोपांसंदर्भात ठोस पुरावे सादर करण्याचं आवाहन मुंढे यांनी केलं असून, विशिष्ट अधिकाऱ्यांविरोधात अद्याप तक्रार प्राप्त झाली नसल्याचं त्यांनी स्पष्ट केलं आहे.