सोलापुरात 80 टक्के पिकांचं नुकसान; शेतकऱ्यांसाठी गोरेंचं महत्त्वाचं आवाहन, शरद पवारांच्या दौऱ्यावर म्हणाले...

सोलापूर : राज्यात गेल्या दीड महिन्यांपासून पावसाने ओढ दिल्याने खरीप हंगाम संकटात सापडला आहे. सोलापूर जिल्ह्यातही पावसाअभावी अनेक भागांतील पिके करपू लागली असून काही शेतकऱ्यांनी उभ्या पिकांवर रोटावेटर फिरवल्याचे प्रकार समोर आले आहेत. या पार्श्वभूमीवर सोलापूरचे पालकमंत्री जयकुमार गोरे यांच्या उपस्थितीत टंचाई आणि दुष्काळी परिस्थितीचा आढावा घेण्यासाठी बैठक घेण्यात आली.

या बैठकीनंतर बोलताना जयकुमार गोरे यांनी जिल्ह्यातील परिस्थिती गंभीर असल्याचे सांगितले. सोलापुरात सुमारे 50 टक्के पाऊस झाला असून जवळपास 80 टक्के पिकांचे नुकसान झाल्याचे त्यांनी म्हटले. पुढील 15 दिवसांत समाधानकारक पाऊस न झाल्यास पिकांचे नुकसान 100 टक्क्यांपर्यंत जाऊ शकते, अशी शक्यताही त्यांनी व्यक्त केली.

शरद पवारांच्या दुष्काळ दौऱ्यावर गोरेंची प्रतिक्रिया

ज्येष्ठ नेते शरद पवार 28 सप्टेंबरपासून राज्यातील दुष्काळग्रस्त भागांचा दौरा करणार असल्याच्या पार्श्वभूमीवर जयकुमार गोरे यांना प्रश्न विचारण्यात आला. शरद पवारांच्या अनुभवाचा सरकारला फायदा होईल का, या प्रश्नावर गोरे यांनी उपरोधिक प्रतिक्रिया दिली.

“अशा अनुभवाने फायदा झाला असता तर राज्यात दुष्काळच पडला नसता,” असे गोरे म्हणाले. मुख्यमंत्री देवेंद्र फडणवीस यांच्या नेतृत्वाखाली सध्या अनेक कामे केली जात असल्याचेही त्यांनी सांगितले. ही कामे पूर्वीच झाली असती तर आजची परिस्थिती निर्माण झाली नसती, असा दावा त्यांनी केला.

दरम्यान, शरद पवार यांनी यापूर्वी मुख्यमंत्री देवेंद्र फडणवीस यांना पत्र लिहून राज्यात कोरडा दुष्काळ जाहीर करण्याची तसेच दुष्काळग्रस्त शेतकऱ्यांना हेक्टरी 50 हजार रुपयांची मदत देण्याची मागणी केल्याचे सांगण्यात आले आहे.

धैर्यशील मोहिते पाटलांनाही प्रत्युत्तर

धैर्यशील मोहिते पाटील यांनी केलेल्या टीकेवरही जयकुमार गोरे यांनी प्रतिक्रिया दिली. आपल्या मतदारसंघात टँकर सुरू असून त्याकडे लक्ष दिले जात असल्याचे त्यांनी सांगितले. मात्र मोहिते पाटील हेही त्या भागाचे लोकप्रतिनिधी असल्याने त्यांनी संबंधित परिसराचा दौरा करावा, असा टोला गोरे यांनी लगावला.

रोहित पवारांच्या टीकेवरही त्यांनी प्रतिक्रिया देत विविध नेते दुष्काळी भागांचे दौरे करत असून त्यांच्या अनुभवाची माहिती सरकार घेईल, असे म्हटले.

68 गावांमध्ये टँकर; वर्षभराच्या पाण्याचे नियोजन

जिल्ह्यात भविष्यात उद्भवू शकणाऱ्या पाणीटंचाईच्या पार्श्वभूमीवर पिण्याचे पाणी, शेतीसाठी पाणी, टँकर तसेच जनावरांच्या चाऱ्याचे नियोजन करण्याच्या सूचना प्रशासनाला देण्यात आल्याचे गोरे यांनी सांगितले.

उजनी धरण भरलेले असले तरी सोलापूर जिल्ह्यातील 68 गावांमध्ये सध्या टँकर सुरू असल्याची माहिती त्यांनी दिली. परिस्थिती आणखी गंभीर होण्याची शक्यता लक्षात घेऊन वर्षभरासाठी पिण्याच्या पाण्याचा साठा राखून ठेवण्याच्या दृष्टीने नियोजन केले जात असल्याचेही त्यांनी स्पष्ट केले.

15 ऑक्टोबरपर्यंत परतीच्या पावसाची अपेक्षा

सोलापूर जिल्ह्यात साधारणपणे परतीचा पाऊस होत असल्याने 15 ऑक्टोबरपर्यंत पावसाची अपेक्षा असल्याचे गोरे म्हणाले. मात्र परतीच्या पावसाची वाट न पाहता पिकांच्या नुकसानीचा सर्व्हे सुरू करण्याच्या सूचना प्रशासनाला देण्यात आल्याचे त्यांनी सांगितले.

सर्व्हे आणि त्याचा अहवाल वेळेत पूर्ण व्हावा, यासाठी प्रशासनाने आतापासून तयारी करावी, असे निर्देशही देण्यात आल्याचे त्यांनी नमूद केले.

‘पंचनामे होईपर्यंत रोटावेटर फिरवू नका’

दुष्काळ जाहीर करण्यासाठी काही निश्चित निकष असून 5 ऑक्टोबरपर्यंतच्या परिस्थितीचा विचार केला जातो, असे जयकुमार गोरे यांनी सांगितले. विद्यार्थ्यांची फी, रोजगार, पिण्याचे पाणी यासह विविध बाबींवर शासन विचार करत असल्याचेही त्यांनी म्हटले.

दरम्यान, पिकांच्या नुकसानीचे पंचनामे पूर्ण होईपर्यंत शेतकऱ्यांनी उभ्या पिकांवर रोटावेटर फिरवू नये, असे आवाहन त्यांनी केले. काही भागांत आता पाऊस झाला तरी पिकांना फायदा होण्याची शक्यता कमी आहे, तर काही भागांत परतीचा पाऊस झाल्यास पिके पुन्हा उभी राहू शकतात, असेही जयकुमार गोरे यांनी सांगितले.