'विद्यानंदच्या पाठीशी नाही, तर बरोबर आहोत!' डीजेविरोधातील लढ्याला सुमित राघवन यांचा पाठिंबा; अमोल पालेकरांच्या हस्ते बापटांचा गौरव

पुणे : पुण्यातील गणेशोत्सव आणि विसर्जन मिरवणुकांदरम्यान होणाऱ्या ध्वनिप्रदूषणाविरोधात सातत्याने आवाज उठवणारे सामाजिक कार्यकर्ते विद्यानंद बापट यांचा रविवारी ज्येष्ठ अभिनेते अमोल पालेकर यांच्या हस्ते गौरव करण्यात आला. मधुरजग प्रतिष्ठान, ब्राईट्स सोसायटी आणि विचारवेध या संस्थांच्या वतीने या गौरव सोहळ्याचे आयोजन करण्यात आले होते. यावेळी अभिनेते सुमित राघवन आणि चिन्मयी सुमित उपस्थित होते.

कार्यक्रमात सुमित राघवन यांनी डीजे आणि ध्वनिप्रदूषणाविरोधातील बापट यांच्या भूमिकेला पाठिंबा दर्शवला. बापट यांच्यासोबत हा लढा पुढे सुरू ठेवण्याचा निर्धारही त्यांनी व्यक्त केला.

'विद्यानंदच्या पाठीशी नाही, तर त्याच्याबरोबर आहोत!'

यावेळी बोलताना सुमित राघवन म्हणाले की, आम्ही अभिनयाच्या माध्यमातून वेगवेगळ्या भूमिका करत असतो. मात्र, कलाकार म्हणूनच नव्हे, तर माणूस म्हणूनही सामाजिक प्रश्नांवर भूमिका घेणे महत्त्वाचे आहे. विद्यानंद यांनी सुरू केलेल्या या लढ्यात समविचारी नागरिकांनी सहभागी होऊन त्यांना साथ देण्याची गरज असल्याचे त्यांनी सांगितले.

विद्यानंद बापट यांचे फोटो लावून त्यांची हेटाळणी करणे आणि त्यांच्या विरोधाला प्रत्युत्तर म्हणून डीजे वाजवल्याचे बॅनर लावणे, यावरही राघवन यांनी टीका केली. एखाद्या मुद्द्याला तार्किक किंवा वैचारिक पातळीवर उत्तर देता येत नसल्यामुळे अशा प्रकारे हेटाळणी केली जाते, असे मत त्यांनी व्यक्त केले.

"आम्ही तुझ्या पाठीशी नाही, तर तुझ्याबरोबर आहोत," अशा शब्दांत सुमित राघवन यांनी विद्यानंद बापट यांना पाठिंबा दिला.

'धर्म आणि सण घरापुरतेच मर्यादित ठेवले पाहिजेत'

धार्मिक सण आणि उत्सवांबाबतही सुमित राघवन यांनी आपली भूमिका स्पष्ट केली. धर्म आणि सण घरापुरते मर्यादित ठेवले पाहिजेत, असे मत त्यांनी मांडले. इतर लोक करतात म्हणून आपणही त्याच गोष्टी करणे योग्य नसून भविष्याचा विचार करून आपल्या चुका सुधारण्याची आवश्यकता असल्याचे ते म्हणाले.

रस्त्यांची दुरवस्था आणि इतर नागरी समस्या सोडवण्यासाठी समाजातील उत्साह आणि ऊर्जा वापरली पाहिजे, असेही त्यांनी सांगितले. विद्यानंद बापट यांनी सुरू केलेला ध्वनिप्रदूषणाविरोधातील जागर आणखी व्यापक व्हावा आणि नागरिकांच्या आयुष्यात शांतता निर्माण व्हावी, अशी अपेक्षा त्यांनी व्यक्त केली.

कार्यक्रमात तिघांनीही काळ्या रंगाचे कपडे परिधान केले होते. मात्र, आम्ही निषेध म्हणून काळे कपडे घातलेले नाहीत, तर हा केवळ योगायोग आहे, असे राघवन यांनी मिश्कीलपणे सांगितले.

ध्वनिप्रदूषणाविरोधातील लढा आता न्यायालय आणि कायदेमंडळात

या कार्यक्रमापूर्वी विद्यानंद बापट आणि आयोजकांनी ध्वनिप्रदूषणाविरोधातील आंदोलनाबाबत आपली भूमिका मांडली. बापट यांनी घेतलेल्या भूमिकेमुळे अनेक ठिकाणी ध्वनिप्रदूषणाला आळा बसल्याचा दावा आयोजकांनी केला.

दरम्यान, हा लढा यापुढे न्यायालयीन आणि कायदेमंडळाच्या पातळीवर नेणार असल्याचे बापट यांनी स्पष्ट केले. पुण्यातील यंदाची गणेश विसर्जन मिरवणूक अधिक काळ लांबल्याबद्दल त्यांनी नाराजी व्यक्त केली. मिरवणुका लांबवण्यासाठी परवानगी देणेच चुकीचे असल्याचे त्यांनी म्हटले.

विसर्जन मिरवणुका लांबवण्याच्या प्रवृत्तीवरही बापट यांनी कठोर शब्दांत टीका केली. ध्वनिप्रदूषणाविरोधातील आपला लढा पुढेही सुरूच राहणार असल्याचे त्यांनी सांगितले.

या गौरव सोहळ्याला सुमित राघवन आणि चिन्मयी सुमित उपस्थित होते. तसेच बापट यांनी ध्वनिप्रदूषणाविरोधातील न्यायालयीन लढ्याबाबत मांडलेल्या भूमिकेचे वृत्तही प्रसिद्ध झाले आहे